Higgsfield негізін қалаушы қазақстандықтар долларлық миллиардер атануы мүмкін

Қазақстандық кәсіпкерлер негізін қалаған жасанды интеллект саласындағы Higgsfield стартапы жаңа инвестициялық раундта $400 млн қаржы тартты. Мәміле нәтижесінде компанияның нарықтық бағасы $5,4 млрд-қа жетті. Бұл туралы Financial Times жазды. 
Жаңа раундқа DST Global, Goldman Sachs, Liberty Global және Intel, сондай-ақ бірқатар халықаралық инвестициялық компаниялар қатысты. Тартылған қаражат корпоративтік өнімдерді дамытуға, қауіпсіздік жүйелерін жетілдіруге және есептеу қуаттарын арттыруға бағытталмақ. 
Higgsfield-тің құны небәрі бірнеше айдың ішінде бірнеше есе өсті. Осы жылдың басында компания $80 млн инвестиция тартып, $1,3 млрд-қа бағаланған еді. Енді оның бағасы $5,4 млрд-қа дейін көтерілді.
Компанияның қаржылық көрсеткіштері де қарқынды өсіп келеді. Financial Times мәліметінше, 2026 жылдың тамызында Higgsfield-тің жылдық есепке шаққандағы табысы $700 млн-ға жеткен. Бір жыл бұрын бұл көрсеткіш шамамен $20 млн болған. Қазір платформаны әлемнің 238 елі мен аумағында 30 миллионнан астам адам пайдаланады. 
Соңғы уақытта Higgsfield жеке контент жасаушылармен қатар корпоративтік секторға көбірек назар аудара бастаған. Компания негізін қалаушылардың бірі Алекс Машрабовтың айтуынша, қазір табыстың басым бөлігі бизнес-клиенттерден түседі. Ал жыл басында корпоративтік клиенттердің үлесі 25%-дан аз болған. 
Higgsfield AI генеративті жасанды интеллект көмегімен видео және визуалды контент жасауға арналған құралдарды әзірлейді. Компанияны қазақстандық AI-инженер Ерзат Дулат пен бұған дейін Snap компаниясында Generative AI бағытын басқарған Алекс Машрабов құрған. Машрабов сонымен қатар Snap 2020 жылы $166 млн-ға сатып алған AI Factory стартапының негізін қалаушылардың бірі болған. 
Higgsfield платформасы жасанды интеллект арқылы сурет пен видео жасауға, оларды өңдеуге және маркетинг пен әлеуметтік желілерге арналған визуалды контент өндірісін автоматтандыруға мүмкіндік береді. 
Жаңа $5,4 млрд бағалау Higgsfield-ті Қазақстанмен байланысты ең қымбат технологиялық стартаптардың біріне айналдырып отыр.