III жасөспірімдер Азия ойындары аясында Қазақстанның Мемлекеттік Туын көтеру рәсімі өтті

Манамада (Бахрейн Корольдігі) Қазақстан Республикасының Мемлекеттік Туын көтеру ресми рәсімі және дәстүрлі символикалық сыйлықтармен алмасу өтті, – деп хабарлайды  Aikyn.kz.

Іс-шараға Қазақстан Республикасы Туризм және спорт министрлігі Спорт және дене шынықтыру істері комитетінің төрағасы Руслан Есеналин және Бахрейн-2025 III жасөспірімдер Азия ойындары ұйымдастыру комитетінің вице-президенті Ахмед Абдулгаффар қатысты.

22-31 қазан аралығында Бахрейн Корольдігінің астанасы Манама қаласында өтетін III жасөспірімдер Азия ойындары басталады. Додаға 45 елден келген спортшылар 29 спорт түрі бойынша жүлделерді сарапқа салады.

Қазақстан бұл ойындарда спорттың 21 түрінен сынға түседі. Ұлттық делегация құрамына 303 адам енді, оның ішінде 220 спортшы мен 51 жаттықтырушы бар. Делегация құрамында жүзу, жеңіл атлетика, бокс, күрес, дзюдо, таеквондо, триатлон, ауыр атлетика, джиу-джитсу, киберспорт, гандбол, жағажай волейболы, 3х3 баскетбол, гольф және басқа да спорт түрлерінің өкілдері бар.

Гандболдан Қазақстанның қыздар құрамасы Бахрейндегі жасөспірімдер Азия ойындарында екінші жеңісіне қол жеткізді. Топтық кезеңдегі матчта қазақстандықтар Үндістан командасын 39:26 есебімен тізе бүктірді. Бұған дейін біздің спортшылар Гонконг құрамасын 40:24 есебімен жеңген болатын.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.