Инновацияға бет бұрған компания

Теміржол саласын цифрландыру - уақыт талабы. Осы бағытта табысты жұмыс істеп тұрған отандық тасымалдаушылардың да еңбегі елеусіз қалмайды.

Атап айтқанда, «DAR RAIL» компаниясы «Алтын сапа» байқауының барлық кезеңінен сүрінбей өтіп, «Іскер» арнайы сыйлығының иегері атанды. Айта кету керек, аталған серіктестік өз жұмысында жасанды интеллект пен IT-жүйені енгізген кәсіпорындар қатарында.

Осыдан 7 жыл бұрын темір жол арқылы өзінің алғашқы жүк тасымалын жасаған «DAR RAIL» бүгінде үздіктердің қатарында. Бұл атақ республика деңгейінде де мойындалып отыр. Логистикадағы маңызды серіктестік «Алтын сапа» байқауының барлық кезеңінен сүрінбей өтіп, ұлттық деңгейге жол тартты. Соның нәтижесінде «Іскер» арнайы сыйлығының номинанттарының бірі атанып, еңбектері еленді.

Ринат Дүйсенов, «DAR RAIL» ЖШС бас директоры:

- Биыл біз «Іскер» сыйлығына ие болдық. Жеке кәсіпорын ретінде біз үшін бұл марапаттың маңызы зор. Себебі бұл сыйлық инновациялық өнімдерді енгізген, жаңа жұмыс орындарын ашқан, жұмыс тиімділігін арттырып, Қазақстандағы бизнесті дамытуға үлес қосқан кәсіпкерлерге беріледі. Осыдан 2 жыл бұрын біз «Парыз» сыйлығын иеленген едік.

Бүгінде «DAR RAIL» серіктестігінде жылдық жүк айналымы 30 млн тоннаны құрап, 1,5 мыңнан астам вагон тәулік бойы жүк тасымалмен айналысады. 600-ге жуық маман еңбек ететін компанияда қазір 44 магистральді локомотиві бар.

Ринат Дүйсенов, «DAR RAIL» ЖШС бас директоры:

- Теміржол арқылы жүк тасымалдау тиімділігі жөнінен біздің көрсеткіштеріміз елде ең жоғары саналады. Біз бұл нәтижеге цифрландырудың арқасында қол жеткіздік. Біздің өзіміздің интеллектуалды IT-жүйеміз бар.

Қазір бизнес географиясы да кеңейіп келеді. Бүгінде компания Қытай бағыты бойынша мультимодальды тасымалдарды белсенді түрде дамытып жатыр. Болашақта маршруттар саны, әсіресе, халықаралық бағыттар көбейе түспек.

Авторлары: Риат Шони, Марат Диханбаев