Ақтөбе облысындағы ауыл тұрғындары шағын және орта бизнеске бет бұрған

Qazaq24.com, 24.KZ дереккөзінен алынған мәліметтерге сүйене отырып жаңалық жариялады..

Ақтөбе облысының Ырғыз ауданында соңғы үш жылда 162 жоба жүзеге асырылды.

Жеке кәсіп ашып, нәпақа тауып жүргендердің басым бөлігі «Ауыл аманаты» мемлекеттік бағдарламасына иек артқан. Тұрғындар ауыл шаруашылығымен қатар шағын және орта бизнеске бет бұрған.

Заманбек Сарин көлік жөндеу шеберханасын ашу үшін Ақтөбеден Ырғыз ауылына қоныс аударды. Мұндай кәсіпке қомақты қаражат қажет болған. Осыған орай «Ауыл аманаты» бағдарламасына иек артқан. Ғимарат тұрғызып, құрал-саймандарды сатып алуға 8 млн теңге шамасында несие рәсімдеді.

Заманбек Сарин, кәсіпкер:

- Тәжікстаннан келіп жатқандар бар, Өзбекстаннан, жолда бұзылып келіп жатқандар көп. Мотор, ходовка, сварка, машинаға қандай қатысы бар соның барлығын жасаймыз. Бұйырса баламды тәрбиелеп жатырмын соған енді. Ұлымды оқытамын ба деп талаптанып отырмын, тоғыз бітіріп жіберемін автоэлектрикке.

Ырғыздағы алғашқы оқу орталығы да «Ауыл аманаты» мемлекеттік бағдарламасының қолдауымен ашылды. Бұл жерде 200-ден астам оқушы мектептен тыс білім алады. Жеткіншектер түрлі лицей мен оқу ордаларының емтиханына дайындалып, ұлттық бірыңғай тестілеу сұрақтарын пысықтайды.

Ақнұр Әйіп, оқу орталығының әкімшісі:

- 60 бала тегін оқиды және бізде 15-тен астам жоғары категориялы мұғалім сабақ береді. Бізде бастауыш сыныптар, ағылшын тілі, математика және басқа да пәндер оқытылады.

Өңірде «Ауыл аманаты» бағдарламасы жүзеге асқалы 913 млн теңгеге бағаланған 162 жоба іске қосылды. 80 отбасы төрт түлік өсірсе, 25 құс шаруашылығы ашылды. Ауданда шағын және орта бизнесті қолға алған жаңадан 50 кәсіпкер тіркелді. Осылайша 200-ге жуық жаңа жұмыс орны пайда болды.

Есет Молбаев, Ырғыз аудандық кәсіпкерлік және ауыл шаруашылығы бөлімінің басшысы:

"Ауыл аманатын" біздер бірыңғай шағын бизнеске, өңдеуге, құс шаруашылығына сондай мән беріп кәсіпкерлерімізді, жеке тұрғындарымызды сол бағытқа тарттық. Жұмыссыздықтың санын азайтуға үлкен жәрдемін тигізді, атаулы әлеуметтік көмек алатын адамдардың санын азайтуға да үлкен пайдасын тигізіп тұр.

Биыл жергілікті атқарушы билік өкілдері «Ауыл аманаты» бағдарламасына 18 тұрғыннан құжат қабылдаған. 6 жоба мақұлданып, 40 млн-ға жуық теңге бөлінді.

Мансұр Есқожин, Болатбек Молдағалиев, Айбек Даутов

Жағдайды бақылауды жалғастырыңыз, Qazaq24.com әрқашан ең жаңа жаңалықтарды ұсынады.