Астана әкімдігі 3 мың шағын және орта бизнеске қолдау көрсетті

Бүгін «Amanat» партиясы Астана қалалық филиалы жанындағы Кәсіпкерлік мәселелері жөніндегі үйлестіру кеңеснің отырысы өтті, - деп хабарлайды Aikyn.kz

Жиын барысында Үйлестіру кеңесінің тең төрағасы, «Amanat» партиясы Астана қалалық филиалының атқарушы хатшысы Мұхаммед Болысбек сөз сөйлеп, отырыстың негізгі себебі кәсіпкерлердің мүддесін қорғау керегін жеткізді.

– «AMANAT» партиясының төрағасы Ерлан Қошанов тапсырмасымен Кәсіпкерлік мәселелері жөніндегі үйлестіру кеңесінің құрылуы – бүгінде маңызды алаңның біріне айналды. Кеңестің негізгі бағыты – инветиция тарту, қолдау шараларын жетілдіру, кәсіпкерлердің мүдделерін қорғау. Сол себепті аз да болса бір кәсіптің өсіп, өнуіне атсалысуымыз тиіс, – дейді «Amanat» партиясы Астана қалалық филиалының атқарушы хатшысы  Мұхаммед Әбдіәшімұлы.

Басқосуда жекеменшік ісін ашып, кәсібін жүргізіп отырған елордалық кәсіпкерлер  өздерін алаңдатып отырған мәселелерін көтеріп, жылдар бойы шешімін таппай келе жатқан мәселелерін ортаға салды. Олардың сауалдарына Астана қаласы әкімінің орынбасары Евгений Глотов, Астана қаласының Инвестициялар және кәсіпкерлікті дамыту басқармасы  басшысының орынбасары Қуаныш Сапаров,  «Атамекен» ҰКП директоры әрі үйлестіру кеңесінің мүшесі Жеңіс Тайтышев,  KORGAN заңдылы компаниясы ЖШС-нің директоры Сәкен Ешмұратов,  «Amanat» партиясы Астана қалалық филиалы жанындағы Экономика және кәсіпкерлік мәселелері жөніндегі Кеңестің Төрағасы Талғат  Дүйсековтер талқыға салды.  Сондай-ақ отырысқа Астана қаласының маслихат депутаттары, Астана қаласы әкімдігінің бірқатар басқарма өкілдері қатысты.

Астана қаласы әкімінің орынбасары Евгений Сергеевичтің айтуынша, Астана – мүмкіндіктер тоғысқан ірі мегаполис. Бүгінде қаланың экономикасында шағын және орта бизнестің үлесі шамамен 70 пайызға жеткен.

– Астанада 272 мыңнан астам бизнес субъектісі жұмыс істейді. Сонымен бірге, шағын және орта бизнес жыл сайын 10 пайызға өсіп келеді. Осы секторда 740 мың адам жұмыспен қамтылған. Сондықтан елорданың көркейюіне үлес қосатын фактордың бірден бірі – шағын және орта бизнес. Бүгінде кәсіпкерліктің өркендеуіне, оларға қолайлы жағдай жасауға бар күшімізді салып жатырмыз. Бұл – біздің басты міндетіміз. Оның бірі – қаржылық қолдау. Мысалы «Өрлеу» бағдарламасы 2025 жылға бизнес өкілдеріне жеңілдетілген пайыздық мөлшерлемемен несие ұсынады. Бағдарлама басталғалы 71 миллиард теңгеге 164 жоба  қосылды. Бұл – республикалық көрсеткіштің бестен бір бөлігі. Сыйақы мөлшерлемесін субсибиялау  бойынша жергілікті бюджеттен 11,3 млрд теңге бөлініп, шамамен 3 мың шағын және орта бизнеске қолдау көрсетілді. Екіншіден – әлеуметтік кәсіпкерлікті дамыту. Бұ жағынан Астана бірінші орында тұр. 1520 субъектіні 268-і біздің қаламызда орналасқан, – дейді Астана қаласы әкімінің орынбасары Евгений Глотов.

«Атамекен» ӨКП директоры әрі үйлестіру кеңесінің мүшесі Жеңіс Тайтышев мұндай жиынның бизнес өкілдеріне берері көп дейді.

– Бұл кеңес – кәсіпкерлердің дауысы естіліп, жүйелі түрде шешімі табылатын тағы бір маңызды алаң. Кәсіпкерлер палатасы атынан айтарым, біз әрқашан сіздерді қолдауға дайынбыз. Өйткені бүгінгі басқосу – кәсіпкерлік қауымдастық пен мемлекеттік органды байланыстыратын алтын көпір, – деді Жеңіс Аждарұлы.