Орта және шағын бизнеске қолдау көбейеді

Экономика министрлігі 2026 жылдан бастап фискалдық саясат арқылы бюджеттің кіріс бөлігін 4 трлн теңгеге ұлғайтуды көздеп отыр.  Бұл дегеніміз салық түрі көбейіп, кейбір жеңілдіктер қысқаруы мүмкін.

Сондай-ақ көлеңкелі экономика азайып, акциздер артуы ықтимал. Бұл туралы Үкімет отырысында баяндама жасаған Экономика министрі мәлімдеді. 

2026 жылғы Экономика министрлігінің межесі белгіленді. Бюджетке 4 трлн теңге түседі деген жоспар бар. Бұл қаржы отандық бизнесті дамытуға жұмсалады. Ал оның 400 млрд теңгесі өңірлердегі шағын бизнесті қолдауға бөлінеді. Бұл үшін «Іскер аймақ» бағдарламасы іске қосылмақ. Оның игілігін ауыл шаруашылық шикізатын қайта өңдеу, наубайхана, жиһаз және құрылыс өндіру секілді тез нәтиже беретін әрі жылдам жүзеге асатын жобаларды қолға аламын дейтін азаматтар көре алады. Ескеретіні, бір жобаға берілетін несиенің шекті мөлшері 200 млн теңге. Мөлшерлемесі 8.8 пайыз. Мерзімі үш жылға дейін.

ҚР Премьер-министрінің орынбасары, Ұлттық экономика министрі:
- Бұл қосымша қаржы ресурстары Президент пен Үкіметтің тапсырмасына сәйкес, бірінші кезекте, қазақстандық бизнесті дамытуға және қолдауға бағытталатын болады. Салық базасын кеңейту қағидаты сонымен қатар бизнес субъектілерінің кірісін арттыруымен бірге жаңа фискалдық саясаттың айқындаушы элементтерінің бірі болып табылады.

Шағын және орта бизнес өкілдерін қолдау жұмыстары жан-жақты жүргізілуде. Мәселен, салық есебін тапсыру нысандарының саны жыл сайын төмендеп келеді. Мысалы, 2009 жылдан бері 70-тен 60%-ға азайған.

Мәди Тәкиев, ҚР Қаржы министрі:
- Енді қосымша 2026 жылдың 1 қаңтарынан бастап міндеттемелер сомасы 1 млн теңгеден аспайтындар үшін мүлік, көлік және жер салықтары бойынша ағымдағы төлемдерді тоқсан сайын таппсыру міндеті жойылады. Кәсіпкер жыл қорытындысы бойынша бір декларация тапсырып, оларды сол кезде төлейтін болады.

Ресми дерек бойынша бүгінде елімізде 2 млн-нан атсам шағын бизнес субъектісі жұмыс істейді. Онда 4 млн азамат жұмыспен қамтылған. Үкімет басшысы бұл кәсіп иелерін қолдау үшін салықтық есептілік 30%-ға, салықтар мен алымдардың саны 20 пайызға қысқаратынын айтты. Бұл кәсіпкерлердің есеп беруге жұмсалатын уақытын азайтып, бизнесін дамытуға көбірек көңіл бөлінуіне ықпал етеді.

Олжас Бектенов, ҚР Премьер-министрі:
- Біз жоспарлы салық тексерулерінен толық бас тарттық. Адал бизнес салық органдарының келуін күтпей, алаңсыз жұмыс істеуге мүмкіндік алады. Айыппұл салуға емес алдын-алуға баса назар аудару, ықтимал заңбұзушылықтар орын алған кезде алдын ала хабардар ету тетігі енгізіледі.