Instagram 10 жыл ішінде алғаш рет логотипін жаңартты және жаңа трендті іске қосты

Instagram кейінгі 10 жылда алғаш рет қолданбаның жоғарғы жағындағы логотипін өзгертті. Желі қолданушылары жаңа дизайнды талқылап, оны ягуарға ұқсатып жатыр, ал басқа компаниялар өз логотипін осы стильде өзгертіп жатыр, деп хабарлайды Tengri Life.

Instagram логотипін жаңартты

Өзгеріс туралы Instagram басшысы Адам Моссери жеке аккаунтында мәлімдеді.

Оның айтуынша, бұрынғы логотип он жыл бойы өзгермегендіктен, компания сыртқы түрін аздап жаңартуды жөн көрген. Бұл ретте дизайнерлер түпнұсқа белгінің танымал элементтерін сақтап қалған.

"Қолданбаның жоғарғы бөлігіндегі логотип 10 жыл бойы өзгерген жоқ, сондықтан оны жаңартатын уақыт келді. Ол анағұрлым жинақы әрі заманауи кейіпке енді. Бұл ретте түпнұсқаға сілтемелер мен Instagram-ның ажырамас бөлігі саналатын қарапайымдылық пен детальдарға деген ұқыптылық сақталды", - делінген жазбада.

Instagram-дағы бұл жазбаны көру

A post shared by Adam Mosseri (@mosseri)

Моссеридің жазбасы 230 мыңнан астам лүпіл жинады.

Қолданушылар бұл өзгерісті негізінен оң қабылдады. Кейбіреулер жаңа логотипті ягуарға ұқсатып, заманауи көрінетінін атап өтті.

"Маған қатты ұнады!", "Керемет логотип - заманауи, ықшам, сонымен бірге өзіндік сипаты бар. Тағы кімге ұнады?", "Расында керемет көрінеді", - деп пікір білдірді желі қолданушылары.

Дегенмен, редизайнды ұнатпағандар да табылды. Кейбір қолданушылар жаңа жазудағы "r" әрпі "z" әрпіне көбірек ұқсайтынын байқаған. Ал басқалары көршілес әріптерге назар аударып, "n" мен "s" әріптері визуалды түрде бірігіп, "m" сияқты қабылдануы мүмкін деп әзілдеді.

Instagram-ның жаңа дизайны қарапайым қолданушыларды ғана қызықтырып қоймаған сияқты.

Жазба жарияланғаннан кейін басқа компаниялар Instagram-ның жаңаруын әлеуметтік желідегі шағын трендке айналдырып, өз логотиптерін ұқсас үлгіде көрсете бастады.

Бұл үрдіске қосылған компаниялардың бірі - OpenAI болды. ChatGPT аккаунтында логотиптің жеке интерпретациясы жарияланды.

Instagram-дағы бұл жазбаны көру

A post shared by ChatGPT (@chatgpt)

Сондай-ақ Snapdragon процессорларын әзірлеуші ретінде танымал Qualcomm компаниясы трендке қолдау көрсетті.

Скриншот: Threads

Логотиптің өзгеруі Instagram-дағы кейінгі кезде болған жалғыз елеулі өзгеріс емес. Маусымда лента парақтау, Reels және Stories қарау мүмкіндігі тек смартфонмен шектелмейтіні белгілі болды. Instagram теледидарлық нұсқасын кеңейтетінін хабарлап, Smart TV-ге арналған қолданбасын іске қосты.

Тағы оқыңыз: Meta сұрақтар туғызған жаңа ЖИ функциясын іске қосты

Google News арқылы жаңалықтарымызды қадағалаңыз