Инвесторды сергелдеңге түсірген кім?

Qazaq24.com, Egemen.KZ дереккөзінен алынған ақпаратқа сүйене отырып мәлімет бөліседі..

Солтүстік Қазақстан облысының Тайынша ауданында бір инвестор сегіз ай бойы қой басын 1 мыңға дейін арттыруды көздеген инвестициялық жобасын іске асыра алмаған. Кәсіпкердің жұмысына кедергі келтіріп, заңсыз әрекетке барған мемлекеттік органның ісі прокуратураның араласуымен әшкереленді.

Сурет: baq.kz

Анықталғандай, Ветеринарлық бақылау және қадағалау комитетінің жергілікті инспекциясы тиісті қорытындыны беруден негізсіз бас тартқан. Ведомство өкілдері қой шаруашылығы іргелес жатқан Тапшыл ауылы тұрғындарының мүддесіне қайшы келеді және санитарлық-қорғау аймағына кіріп кетеді дегенді сылтау еткен. Тиісті құжаттың берілмеуі салдарынан инвестор есептік нөмір ала алмай, жобаны іске қосу мүмкіндігінен айырылған.

Тапшыл ауылы қазіргі таңда тарау алдында тұрған елді мекен санатына жатады. Мұнда небәрі бес тұрғын ғана қалған. Аудан орталығынан 35 шақырым қашықта орналасқан ауыл тұрмысқа қолайлы болғанымен, жергілікті халық нәпақа іздеп, өзге өңірлерге қоныс аударған. Осы орайда, бос қалған ауылды сылтауратып, аудан экономикасына серпін бермек болған инвестордың жолын бөгеген мемлекеттік органның бұл әрекеті күмән тудырады.

Былтыр желтоқсан айында Бас прокуратура жанынан Инвесторларды қолдау жөніндегі фронт-офис құрылды. Қазіргі таңда жалпыұлттық пулда құны 894 млрд теңгені құрайтын 51 инвестициялық жоба бар көрінеді. Аталған жобалардың жүзеге асуына жергілікті жерлердегі кейбір мемлекеттік органдар тарапынан жасалған заңсыз кедергілерді жою мақсатында прокуратура органдарының тікелей араласуына тура келген. Солтүстік Қазақстан облысының прокуратурасында да инвесторлардың құқын қорғау тобы құрылып, қазір жұмыс істеп жатыр. Өткен жылдың аяғында ғана аталған топ 30 проблемалық жобаның іске асуына септігін тигізді. Мәселелердің жедел әрі оңай шешілуі кедергілердің көбіне қолдан жасалғанын айғақтайды. Жаңа жыл басталғалы прокуратураның араласуымен екінші мәрте инвестициялық жобаның кедергісіз іске асуы қамтамасыз етілді.

Солтүстік Қазақстан облысы прокурорының аға көмекшісі Қазбек Ғалымжан прокуратура араласқаннан кейін инвесторға ветеринарлық-санитарлық қорытынды жасалып, есептік нөмір берілгенін жеткізді.

«Енді инвестор алаңсыз жұмысқа кірісе алады. Кедергінің заңсыз екені анықталды. Қазірдің өзінде ол 25 млн теңге субсидия алуға тапсырыс берді», деді.

Әрине, инвестордың құқығы қалпына келтірілгені көңіл қуантады. Алайда сегіз ай бойы бизнестің өрістеуіне заңсыз тұсау болып, жобаны тежеген мемлекеттік органның жауапкершілігі қайда? «Жоғалған табыс» дегені неге есептелмеген? Прокуратура өз қолынан келмесе мұндайды есептеп, мемлекеттік органнан сот арқылы өндіріп бермей ме?

Прокуратураның әділ шешім іздеп, ел игілігі үшін еңбек етпек болған инвесторды қолдағаны тек осымен шектеле ме? Инвестициялық жобаларға түрлі сылтаумен, тіпті қасақана кедергі келтірген мемлекеттік органдар жазасыз қала берсе, елде «Заң мен тәртіп» қағидатының орнауы екіталай. Прокуратура бір өңірдегі түйінді тарқатқанымен, өзге жердегі келеңсіздіктің бәрі бірдей назарға іліге бермеуі мүмкін. Егер заңсыздыққа жол бергендерге қатаң шара қолданылса, мемлекеттік органдар тарапынан жасалатын қолданбалы кедергілер де азаяр еді. Осы орайда прокуратураның заңсыздыққа қарсы күресін әлі де болса жүйелі емес, жартыкеш сипатта деп бағалауға тура келеді.

Солтүстік Қазақстан облысы

Соңғы жаңалықтар