Иппотерапияның көмегі көп

Жетісу облысында ерекше күтімдегі балаларды иппотерапиямен емдеу ісі оң нәтиже бере бастады.

Жаркент қаласындағы оңалту орталығы мұндай тәсілді бір жыл бұрын енгізген болатын. Атпен серуендеу арқылы жеткіншектердің , қимыл-қозғалысы ширап, бұлшық еті жетілген.

Атпен серуендеу ерекше күтімдегі бүлдіршіндердің ең сүйікті ісі. Сондықтан олар ипподромға келуге асығады. Көңіл сергітіп, жан  тыныштандыратын жаттығу балаларға оң әсер етті,- дейді ата-аналар.

Гүлзада Қуандыққызы, Жаркент қаласының тұрғыны:

- Өте көп пайдасы бар. Біріншіден, иппотерапия ашылғалы бері нерв, мінез-құлқы арқылы несі өзгерді. Баламның аяқ-қолы икемге келмей тұратын, соған көмегі өте көп тиіп жатыр.

Ипподромда үш жаттықтырушы жұмыс істейді. Өскеменде біліктілігін арттырған мамандар баланың құлап қалмауын қадағалап, әртүрлі жаттығу жасатқызады.  

Ғалымжан Сахаев, жаттықтырушы:

- Бізге дәрігер мамандардың нұсқауымен келеді. Күніне 13-14 баладай. Әр балаға диагнозына қарай 20-30 минут аралығында осы атқа отырғызып, ем жүргізіп жатырмыз.

Бұл ғимарат бұрын облыс әкімінің резиденциясы болған. Кейін оңалту орталығына берілді. Қазір мекемеде 40 бала ем қабылдайды. Оларға 50-ден аса маман қызмет көрсетеді.

Рүстем Түсбаев, оңалту орталығының қызметкері:

- Бұл жүре алмайтын балалардың миына «мен жүруім керек» деген сигнал береді. Импульс береді. Бұл жерде өзінің жаттығулары болады. Ақырын жүреді, жай жүреді, қаттырақ жүреді, сосын жүгіреді. Сонда баланың бойында «мен жүруім керек» деген клетка оянады. 

Гүлназ Кибраева, оңалту орталығының директоры:

- Бұл жерде ЛФК мамандары, бассейн инструкторлары, иппотерапия инструкторлары, дәрігерлер жұмыс істейді. Екі жылдың ішінде біз үш баланы мектепке жібердік. Екі бала өз аяғымен жүріп балабақшаға кетті. Сондықтан осы орталықты кеңейтсе дұрыс болар еді.

Мұндай оңалту орталықтары облыстың төрт ауданында жұмыс істейді. Сонымен қатар Талдықорған қаласында 150 адамға арналған ғимарат құрылысы қолға алынды.  

Ерекше күтімдегі балаларға арналған  оңалту орталығы Қаратал өзенінің жағалауында салынып жатыр. Мұнда ем-дом  жасайтын бөлмелерден бөлек акт және спорт зал мен жылыжай да салынады.  Ең басты ерекшелігі сол балалар тәулік бойы білікті мамандардың тұрақты бақылауында болады. 

Бейбіт Базархан, мердігер мекеме өкілі: 

- Ғимарат бес бөліктен тұрады. 21 мың шаршы метр. Құрылыс осы жылдың 30 қазанында басталды. Қазір 35 адам жұмыс істеп жатыр. Бұйырса 2026 жылдың аяғында толық өткізіп жұмысты бітіреміз.

Жетісу облысында ерекше күтімді қажет ететін 3200 ден аса бала бар. Солардың мың шақтысы Талдықорғанда тұрады. Жаңа орталық жеткіншектердің сауығып, қоғамға бейімделуіне оң ықпал етпек.

Авторлары: Шыңғыс Қалиден, Қуаныш Түргенбаев