Иран жауап соққысының жаңа толқыны басталғанын хабарлады

АСТАНА, 11 наурыз - Sputnik. Ислам революциясы сақшылары корпусы АҚШ пен Израиль нысандарына жауап соққысының жаңа толқыны басталғанын мәлімдеді, деп хабарлады Press TV.

"Ислам революциясы сақшылары корпусы АҚШ пен Израильдің стратегиялық нысандарына қарсы операциялардың жаңа толқыны басталғанын жариялады", - делінген телеарнаның Telegram каналында.

Иранның Ресейдегі елшісі Казем Джалалидің айтуынша, Иранға шабуыл жасаған күштерге келтірілетін шығын геометриялық прогрессиямен өсетінін атап өтті.

Оның айтуынша, Иран "жауынгерлік стратегиялар мен тактика саласында бірегей доктринаға ие. Әр қақтығыстың деңгейі мен қарқындылығын өзінің нақты қажеттіліктеріне сәйкес реттейді".

"АҚШ пен Израиль әскерлері Иранның кейбір қорғаныс мүмкіндіктерімен бұрыннан таныс... Агрессия жалғасқан сайын жау күштері мен техникасына залал геометриялық прогрессиямен артады", - деді дипломат.

Иранның БҰҰ жанындағы тұрақты өкілі Әмір Саид Иравани Ирандағы жанармай қоймаларына жасалған соққы азаматтық қауіп төндіреді және ауаның қатты ластануына себеп болды деп мәлімдеді.

"2026 жылдың 7 наурызына қараған түні агрессордың ұшақтары Тегерандағы және басқа қалалардағы жанармай қоймаларына жаппай соққы берді. Бұл шабуылдар атмосфераға қауіпті және улы ластаушы заттардың көп мөлшерін шығарды", - деді Иравани журналистерге.

Иранның Қызыл Жарты Ай қоғамының мәліметіне сілтеме жасай отырып, ол "жарылыстар ауаның қатты ластануына және бейбіт тұрғындардың, әсіресе балалардың, әйелдердің, қарттардың және ауыр науқастардың денсаулығына айтарлықтай қауіп төндірді" деп атап өтті.

Бұған дейін ирандық Қызыл Жарты Ай халыққа мұнай өңдеу зауытындағы өрттен атмосфераға улы заттар тарап, салдарынан қышқыл жаңбыр жаууы мүмкін деп ескертті және халықты сыртқа шығудан бас тартуға шақырды.

28 Ақпанда АҚШ пен Израиль Иран аумағындағы нысандарға, соның ішінде Тегеранға соққы бере бастады, адам шығыны туралы да айтылды.

Иран Израиль аумағына, сондай-ақ Таяу Шығыс аймағындағы АҚШ әскери нысандарына жауап соққы жасады.