Испанияда жұмыс аптасын қысқарту туралы заң жобасы қабылданбады

Испания парламентінің төменгі палатасы жұмыс аптасын 2,5 сағатқа қысқартуды көздейтін заң жобасын қолдамады. Бұл реформа жүргізуде қиындықтарға тап болып отырған социалистік кабинет үшін тағы бір соққы болды, деп хабарлайды Коммерсантъ.

Инициативаға негізгі оппозициялық партиялар ғана емес, бұған дейін үкіметті кейде қолдап келген каталониялық Junts партиясы да қарсы шықты. Нәтижесінде жоба толыққанды талқылауға да шығарылмады.

Заң жобасы Еңбек министрі Йоланда Диас пен елдің ең ірі кәсіподақтарының қатысуымен дайындалған еді. Оның жақтастары жұмыс уақытын қысқарту қызметкерлердің жүктемесін азайтып, өнімділікті арттырады деп есептеді және бұл жалақыны төмендетусіз жүзеге асуы тиіс болатын.

Алайда оппозиция бұл шараны ерте және экономикалық тұрғыдан қауіпті деп атады. Социалистер үкіметі парламентте азшылықта отыр, бюджеттің бөгелуі және жемқорлық жанжалдары жағдайды одан әрі қиындатып тұр. Осылайша, бастама үкімет үшін тағы бір саяси жеңіліс болды.

Еңбек министрі Йоланда Диас бұл ұсынысты болашақта қайта енгізетінін мәлімдеді. Оның айтуынша, жұмыс аптасын қысқарту — еңбек нарығын реформалау бағдарламасының бір бөлігі және ол еңбек жағдайларын жақсартуға, жұмыс пен жеке өмір балансын арттыруға бағытталған.

Бүгін, 15:20