KazJETP құру меморандумы Қазақстанның климаттық міндеттемелерін жүзеге асыруда маңызды қадам болады Ошурбаев

— Бүгінде Қазақстан жекелеген бастамалардан трансформациялардың жүйелі бағдарламаларына көшуі талап етілетін кезеңде тұр. Осы тұрғыдан алғанда Қазақстанның әділ энергетикалық көшуі жөніндегі елдік платформасы — KazJETP құру туралы меморандумға қол қою айрықша маңызға ие бола түседі. KazJETP тек үйлестіруші алаң ғана емес, сонымен қатар айқындалатын ұлттық көміртек үлесі мен көміртек бейтараптығына қол жеткізу жөніндегі жол картасын іске асырудың нақты тетігі ретінде қарастырылады. Экология министрлігі, Энергетика министрлігі және Еуропалық қайта құру және даму банкі күш-жігерін біріктіру энергетикалық көшу бағытындағы ауқымды жобаларды жүзеге асыру үшін берік институционалды негіз қалыптастырады деп сенеміз. Аталған меморандумға қол қою Қазақстанның климаттық міндеттемелерін іс жүзінде жүзеге асыру жолындағы маңызды қадамға айналып, ынтымақтастығымызды жаңа деңгейге көтереді, — деді вице-министр.

Оның атап өтуінше, Қазақстан үшін энергетикалық көшу кезеңі тек экологиялық басымдық қана емес, сонымен қатар мемлекеттік саясаттың стратегиялық бағыты саналады.

— Ол экономиканы жаңғыртумен, энергетикалық қауіпсіздікті нығайтумен және тұрақты өсімді қамтамасыз етумен тікелей байланысты. Қазақстан Париж келісімі аясындағы халықаралық міндеттемелерін жүйелі түрде жүзеге асырып келеді. Оның ішінде 2035 жылға дейінгі кезеңге арналған жаңартылған ұлттық деңгейде айқындалатын көміртек үлесі де бар. Сонымен қатар 2060 жылға дейінгі көміртек бейтараптығына қол жеткізу стратегиясы да жүзеге асырылып жатыр, — деді вице-министр.

Бұған дейін халықаралық ұйымдар Қазақстанның экологиялық бастамаларын қолдағанын жазған едік.