Кендірліде терминал құрылысы басталды

Кендірлі әуежайында жолаушылар терминалының құрылысы басталды. Үш қабатты ғимаратқа инженерлік желілерді қосу бір уақытта жүріп жатыр.

Жалпы ұзындығы 2200 метр болатын ұшу-қону жолағында жер қазу жұмыстары аяқталды. Маңғыстау облысының туристік әлеуетін арттыруды көздейтін жоба Мемлекет басшысының тікелей тапсырмасымен жүзеге асуда. 

Кендірлі әуежайы Қазақстанның картасында биыл пайда болды. Құрылыс алаңының аумағы 600 гектардан асады. Жобаның бастапқы кезеңінде әуежайға инженерлік инфрақұрылым тартылды. Жолаушылар терминалының іргетасы қаланып, металл қаңқасын тұрғызу басталды. Бұл жерде күту залы, тынығу орындары мен кеден бекеті орналасады.

Абай Ноғайбай, учаске бастығы:

- Қазіргі таңда бізде бірінші кезең бойынша жұмыстар жүріп жатыр. Газ, су және байланыс желілері жұмыстары. Екінші кезең бойынша ұшу-қону жолағы. Қазба жұмыстарын бітіріп, кері көму жұмыстарын бастап жатырмыз. Төртінші кезең бойынша бетон құю жұмыстары басталып қойылды. Құрылыс бастында 80-нан аса техника жұмылдырылған. 120-150 адам жұмыс жасап жатыр.

Кендірлі әуежайы өңір туризмін дамытуға бағытталған ауқымды жоба. Себебі келешекте Каспий жағалауында Кендірлі атауымен курорттық шаһар бой көтереді. Оның құрамына Жаңаөзен қаласына қарасты 4 ауыл мен Қарақия ауданындағы бірнеше елді мекенді қосу жоспарланған.

Медет Тоқтасынов, Кендірлі ауылының әкімі:

- Біздегі жоспар бойынша 40-45 мың халыққа арналған. Қазіргі таңда бас жоспар әзірленіп, өзгеріс енгізу жұмыстары жүргізіліп жатыр. Сол жұмыстар толықтай аяқталғаннан кейін инженерлік желілерді тарту бойынша жобаларымыз іске асатын болады. Кендірлі су тұщыту зауытымыздың құрылысы аяқталып, қазіргі таңда өз қызметін бастауға дайын тұр.

Жаңа қала Жаңаөзеннен 65 шақырым, ал Кендірлі демалыс орнынан 14 шақырым жерде орналасады. Қазір курорттық аймақта оннан астам туристік кешен жұмыс істеп тұр. Алдағы уақытта бірнеше қонақүй, аквапарк, шипажайлар және сауықтыру лагерлерін салу жоспарланған. Сәйкесінше, бұл жобалар аясында қосымша жұмыс орындары құрылып, аймақ әлеуетінің артуына серпін береді деп күтіледі. 

Авторлары: Талғат Исламұлы, Саламат Бекбаев