Кенептегі кең әлем

Суреттерді түсірген – Юрий Беккер

Суретші-иллюстратор, дизайнер, театр кос­тюмдерінің су­рет­шісі, авторлық қуыр­шақ­­тар шебері Гүлфарида Жаниярова – Қазақстан Суретшілер одағының және Халық­ара­лық авторлық қуыр­шақ ұйы­мының мүшесі. Ол – осы бе­делді халықаралық ұйым­ның құрамына қабыл­дан­ған елімізден шыққан тұңғыш шебер. Жылдар бойы театр сахнасында жи­нақ­талған тәжі­ри­бе оның шығар­машылық қол­таңбасын айқындап, көркем образ жасау мәдениетін жаңа деңгейге көтерген.

Экспозицияға қойылған елу кескіндеме туындысы мен жиырма авторлық қуыршақ суретшінің ішкі дүниесін тұтас бір көркем әлем ретінде танытады. Мұнда гүлдердің әсемдігі, жануарлар әлемінің тылсым сұлулығы, қазақы дүниета­ным мен  ұлттық нақыш өзара үйлесім тапқан. «Калла гүл-дері», «Қызыл тұңғиықтар», «Қызыл раушандар», «Сары ирис гүлдері», «Күнбағыстар» туындыларында бояулардың қанық үйлесімі мен сәндік шешімдер арқылы суретшінің өмірге деген сүйіспеншілігі мен сұлулыққа іңкәрлігі айқын сезіледі.

Автор қолтаңбасынан туған  әрбір қуыршақтың өз болмысы, өз мінезі бар. Кейіпкер­лер жана­рынан жылылық, ше­бер­­дің композициялық шешімдерінен театр сурет­шісінің кәсіби машығы аңға­ры­лады. Бұл туындыларда қиял мен шынайылық, ертегі мен өмір өзара астасып жатыр.

«Көрмемді «Менің ғажайып әлемім» деп атауымның сыры тереңде. Мені бала кезден табиғат пен жануарлар әлемінің алуан түрлілігі таңғалдыратын. Өмірде адамдар да, өнерде суретшілер де әртүрлі. Бірі Франсиско Гойя секілді тра­ге­диялық қара түстерге бой алдырса, енді бірі өмірді пәк жүрекпен қабылдайтын наивті бағытты серік етеді. Ал менің шығармашылығымның өзегі – жануарларға деген шексіз махаббат. Маған олар адаммен бірге өмір сүру үшін жаралған, тек тілі жоқ тіршілік иелері сияқты көрінеді. Тіпті «Қызыл кітапқа» енген сауыт­ты мүйізтұмсықтарды бей­нелеу үшін грек жаңғағы мен мон­шақтарды қолданып, ерекше декоративті стиль қалып­тастырдым. Мен үшін өнер – көне қобыздың үні сияқты адам жанын ерекше күйге бөлейтін, өз ішімде тұнған ғажайып әлем», дейді суретші.

Шынында да, бұл көрме өмірдің жарық бояуларын жоғалт­пай, сұлулықты қара­пайым дүниеден іздеуге үн­дейді. Кенептегі алуан гүл­дер көрермен жан дүние­сі­не жылылық ұялатып, мейі­рім мен үйлесімнің қадірін сезін­ді­реді.

АЛМАТЫ