Кеңес Рақышев мұнай газ секторындағы үлесін күшейтеді: $304,6 млн дық мәміле жасалмақ

Британдық Nostrum Oil & Gas PLC мұнай-газ компаниясы «Жайықмұнай» ЖШС және «Позитив Инвест» ЖШС активтерін Altaris Holding Ltd және Alturion Holding Ltd компанияларына сату туралы келісім жасасты. Altaris Holding құрылтайшыларының қатарында Кеңес Рақышевқа тиесілі Fincraft Energy Holding Limited бар.
«Жайықмұнай» ЖШС-нің негізгі активі — Батыс Қазақстан облысында, Орал қаласына жақын орналасқан Шынар мұнай-газ конденсаты кен орны. Компания Қазақстанда 1997 жылдан бері жұмыс істейді және мұнай, газ бен газ конденсатын барлау, өндіру, өңдеу және сатумен айналысады.
Ал «Позитив Инвест» ЖШС «Дала барысы» жобасына кіретін Каменское және Каменско-Тепловско-Токаревское учаскелерінде жер қойнауын пайдалану құқығына ие. Бұл учаскелер Шынар кен орнынан батысқа қарай шамамен 60–120 шақырым жерде орналасқан.
Мәміленің жалпы құны $304,6 млн. Алайда соңғы сома сатып алынатын компаниялардың мәміле аяқталған кездегі қарызы, ақшалай қаражаты және таза айналым капиталы ескеріліп, түзетілуі мүмкін.
Nostrum активтерді сатудан түскен қаражатты қарыздарын өтеуге бағыттамақ. Компания қамтамасыз етілген басым облигациялар бойынша берешегін толық, ал қамтамасыз етілмеген басым облигациялар бойынша қарызын ішінара өтеуді жоспарлап отыр.
Мәмілені 2026 жылғы 15 қыркүйекте аяқтау жоспарланған. Алайда оған дейін бірқатар рұқсат пен келісім алынуы тиіс. Атап айтқанда, мәмілені бәсекелестікті қорғау саласындағы уәкілетті орган, Қазақстанның Энергетика министрлігі және QazaqGaz мақұлдауы қажет.
Егер белгіленген мерзімге дейін қажетті талаптар орындалмаса, мәмілені аяқтау мерзімі автоматты түрде тағы екі айға ұзартылуы мүмкін.
Бұл мәміле Кенес Рақышевтің мұнай-газ секторындағы позициясын күшейте түседі. Бұған дейін кәсіпкер Fincraft Group компаниясының мұнайды терең өңдеу және қосылған құны жоғары мұнай өнімдерін өндіру бағыттарына назар аударатынын мәлімдеген.