Коалиция мүшелері ардагерлермен және кәсіпорын қызметкерлерімен пікір алмасты

«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері Түркістан облысына жұмыс сапары барысында жаңа Конституцияның негізгі басымдықтарын кеңінен талқылады, – деп хабарлайды Aikyn.kz.

Іссапар аясында Парламент Мәжілісінің депутаты Ұласбек Сәдібеков, өңірлік өкілдер Жандос Ибраев, Бекжан Айтқұлов, Сапарғали Қайшыбеков, сондай-ақ Түркістан облыстық мәслихатының депутаттары Нұржан Жамалбеков, Сайдирасулхан Ералиев және Динара Егамбердиева Сайрам және Түлкібас аудандарында тұрғындармен және еңбек ұжымдарымен кездесті. 

Олар алдымен Сайрам ауданының орталығы – Ақсукент елді мекеніндегі «Құрмет» ардагерлер үйінде болып, ауданның зиялы қауым өкілдерімен пікір алмасты. Парламент Мәжілісінің депутаты Ұласбек Сәдібеков Конституция преамбуласының мазмұнына тоқталды.

«Конституцияның преамбуласы – құжаттың рухани-идеялық өзегі. Онда халықтың бірлігі, ел тәуелсіздігі, тарихи сабақтастық, ұлттық құндылықтар мен ортақ жауапкершілік айқын көрініс тапқан. Бұл құндылықтар қоғамның мәдени, ғылыми және рухани дамуына негіз болады», - деді ол.

Өткен жылы пайдалануға берілген ардагерлер үйінде аға буын өкілдерінің демалуына және ем алуына барлық жағдай жасалған.  Мекеме бір мезетте 200 қарияны қабылдай алады.

Сондай-ақ коалиция мүшелері Қарасу ауылдық округіне қарасты Абай елді мекенінде «Көрікті Сайрам» ЖШС-нің қызметкерлерімен және аудан тұрғындарымен кездесті. Кездесу барысында жаңа Конституцияда адам құқықтары мен бостандықтарын қорғау, заң үстемдігін қамтамасыз ету және азаматтық қоғам институттарының рөлін арттыру мәселелеріне ерекше назар аударылғаны айтылды. 

«Азаматтың құқығы қорғалмайынша, әділетті қоғам қалыптаспайды. Сондықтан жаңа Конституцияда адам құқықтарын қорғауға, мемлекеттік биліктің ашықтығы мен тепе-теңдігін қамтамасыз етуге және қоғамның шешім қабылдау үдерісіне қатысуына басымдық берілген. Сонымен қатар ұлттық мәдениет пен тарихи мұраны сақтау, білім мен ғылымды дамыту бағыттары маңызды құқықтық нормалары ретінде айқындалды», - деді Түркістан облыстық мәслихатының депутаты Нұржан Жамалбеков.

Сондай-ақ ол халық денсаулығы мен жайлы өмір сүру ортасын қалыптастыруда елді мекендердің тазалығы мен санитарлық жағдайын қамтамасыз ететін коммуналдық сала қызметкерлерінің еңбегі мен қоғамдағы рөлін ерекше атап өтті.

Айта кетейік, бұл мекеме аудан жолдарының сапасын қамтамасыз ету, жол инфрақұрылымын жөндеу, көше жарықтандыру жүйесін орнату, абаттандыру жұмыстарын жүзеге асырады. 

Ал Түлкібас ауданында коалиция мүшелері «Майтөбе сүт» ауыл шаруашылығы тауар өндірушілері кооперативінің еңбек ұжымымен кездесіп, жаңа Конституцияның негізгі бағыттары мен агроөнеркәсіп кешенін дамытудағы рөлі жан-жақты талқыланды.

Түркістан облыстық мәслихатының депутаты Динара Егамбердиева агроөнеркәсіп кешенін дамыту, азық-түлік қауіпсіздігін қамтамасыз ету және отандық өнім өндірушілерді қолдау мемлекет саясатының маңызды бағыттары екенін жеткізді. Оның айтуынша, жаңа Конституцияда меншік құқығын қорғау, кәсіпкерлікті қолдау және ауыл шаруашылығына инвестициялық тұрақтылық қалыптастыруға құқықтық негіздер қарастырылған. Реформаның түпкі мақсаты – әділетті қоғам құру, заң үстемдігін орнықтыру және еңбек адамының құқығын қорғау.

Кәсіпкер Бақытжан Оспанов жетекшілік ететін кооператив айран, сүт, ірімшік және өзге де өнім түрлерін өндіреді. Кәсіпорында 24 адам тұрақты жұмыспен қамтылған. Жылдық өндірістік қуаттылығы 1 мың тонна сүт өнімі. Қазіргі таңда жобалық мүмкіндіктің шамамен 70 пайызы игерілген.

Сондай-ақ коалиция өкілдері Т.Рысқұлов ауылындағы Түлкібас агробизнес және туризм колледжінде білім саласы қызметкерлерімен кездесу өткізді. Жиында педагогтердің мәртебесін көтеру, олардың құқықтары мен әлеуметтік қорғалуын қамтамасыз ету, кәсіби мамандарды қолдау және қауіпсіз еңбек жағдайын қалыптастыру басым бағыттардың бірі екені айтылды.

Жұмыс сапары барысында коалиция мүшелері қоғамның түрлі өкілдерімен ашық пікір алмасып, жаңа Конституцияның мәні мен маңызын кеңінен түсіндірді. Мұндай диалог алаңдары Конституциялық реформаның мазмұнын терең ұғынуға және қоғамның белсенді қатысуын қамтамасыз етуге ықпал етеді.