Көкшетауда Digital Наурыз өтті

Egemen.KZ парақшасындағы ақпаратқа сәйкес, Qazaq24.com хабар таратты..

22 наурыз күні Көкшетау қаласындағы жаңа жағалау аумағында Ақмола облысының цифрландыру және архивтер басқармасы ұлттық мерекенің жаңа мазмұнын айқындайтын ауқымды Digital Наурыз жобасын ұсынды, деп хабарлайды Egemen.kz.

Биыл дәстүрлі мерекелік формат қазақ халқының мәдени мұрасын заманауи цифрлық шешімдермен ұштастырып, тұрғындар мен қонақтарға мүлде жаңа форматтағы мерекелік тәжірибе сыйлады.

Жобаның негізгі бөлігі Digital Auil алаңында ұсынылды. Жағалаудың 1,4 шақырым аумағы толықтай тегін Wi-Fi желісімен қамтылып, бұл мерекелік кеңістікті жай ғана мәдени алаң емес, ашық цифрлық ортаға айналдырды.

Мерекенің басты нысандарының бірі арнайы ұйымдастырылған VR-киіз үй болды. Виртуалды шынайылық көзілдіріктері арқылы келушілер интерактивті тарихи саяхат жасап, ұлттық болмысты цифрлық форматта тереңірек сезіне алды. Киіз үй ішінде «Наурызбай» атты ЖИ-аватар, ал сыртқы алаңда «Наурызай» атты ЖИ-аватар жұмыс істеді. Астана қаласының цифрландыру басқармасымен бірлесіп әзірленген цифрлық ассистенттер қонақтарға мерекенің тарихы, мазмұны және бағдарламасы туралы кеңес берді.

Келушілердің ерекше қызығушылығын туғызған тағы бір аймақ - AR және AI технологияларына негізделген интерактивті фотоаймақ. Мұнда қонақтар ұлттық киімдерді виртуалды түрде киіп көріп қана қоймай, жасанды интеллект көмегімен Наурыз стилінде безендірілген, қазақы нақыштағы дайын цифрлық фотосуреттер ала алды.

Мерекенің спорттық бөлігінде де цифрлық шешімдер кеңінен қолданылды. Алғаш рет «Қой көтеру», «Садақ ату» және «Арқан тарту» жарыстарында төрешілік жасау процесіне компьютерлік көру және нейрожелі технологиялары тартылды. Жүйе қатысушылардың қозғалысын нақты уақыт режимінде талдап, жарыстың ашықтығы мен әділдігін қамтамасыз етті.

Сонымен қатар алаңда өңірдің бірқатар цифрлық жобалары таныстырылды. Үлкен экрандарда дрондардың бірыңғай инфрақұрылымының жұмысы тікелей көрсетіліп, оның өңірлік басқарудағы мүмкіндіктері ұсынылды. Бұдан бөлек, қонақтарға телемедицина, робототехника және өзге де заманауи ІТ-шешімдер көрсетілді. Бұл Digital Наурыздың тек мерекелік емес, сонымен қатар өңірдің технологиялық әлеуетін танытатын ашық алаңға айналғанын көрсетті.

Ақмола облысының цифрландыру және архивтер басқармасы үшін бұл бастаманың негізгі мақсаты - заманауи технологиялардың ұлттық дәстүрлерге қарсы емес, қайта оларды жаңа форматта толықтыра алатынын көрсету. Digital Auil жобасы жасанды интеллект, толықтырылған шынайылық, дрон технологиялары және цифрлық сервистердің мәдени ортада нақты қолданылуын айқын көрсететін бірегей алаң болды.

Наурыз мерекесіне орай ұлттық нақышта безендірілген пойыздар жолға шықты

Мерекелік іс-шара аясында жоба алаңына Ақмола облысының әкімі Марат Мұратұлы Ахметжанов арнайы барып, VR-киіз үйдің жұмысымен, цифрлық шешімдермен және өңірдің технологиялық жобаларымен танысты. Өңір басшысы мәдени ортаға жоғары технологияларды енгізудің, сондай-ақ халыққа мемлекеттік және цифрлық сервистердің қолжетімділігін арттырудың маңыздылығын атап өтті.