Көлікті басқару құқығы тоқтатылады : жол ережесіне енгізілген өзгерістер күшіне енеді

АСТАНА, 22 шілде – Sputnik. Ішкі істер министрлігі жол ережесіне енгізілген өзгерістерді түсіндірді, деп хабарлайды Sputnik Қазақстан.

Заңнамалық түзетулер 25 тамыздан бастап күшіне енеді.

"Ең алдымен, 65 жастан асқан жүргізушілер мен мүгедектігі бар жүргізушілер екі жылда бір рет міндетті медициналық тексеруден өту қажеттігін екенін еске саламыз", - дейді министрлік мамандары.

Міндетті медициналық тексеруден өткені туралы мәліметтер ішкі істер министрлігіне автоматты түрде түседі. Ал тексерістен өткені туралы ақпарат түспесе, көлік құралын басқару құқығы тоқтатылады. Бұл талап тек 65 жастан асқан жүргізушілер мен мүгедектігі бар жүргізушілерге ғана қойылып отыр.

Тағы бір өзгеріс жол жүрісі қағидаларын білу деңгейін қайта тексеруге қатысты. Оған сәйкес, жолда жүру қағидаларын өрескел бұзған жүргізушілер қайтадан теориялық емтиханға жіберіледі. Негізгі себептер:

· жол қиылысынан өту кезінде апаттық жағдай туғызу;

· белгіленген жылдамдықты бірнеше рет асыру;

· маневр жасау;

· жолақ ауыстыру немесе басып озу қағидаларын қауіпті түрде бұзу.

"Егер жүргізуші дәлелді себепсіз тиісті қаулыны алған күннен бастап екі ай ішінде теориялық емтиханға келмесе, бұл да көлік құралын басқару құқығын тоқтатуға негіз болады", - дейді мамандар.

Сонымен қатар алкогольдік, есірткілік немесе уытқұмарлық масаң күйде көлік басқарғаны үшін жауапкершілік күшейтілді. Бұдан былай қылмыстық іс жәбірленуші тараппен татуласуына байланысты тоқтатылғанның өзінде құқық бұзушы сегіз жылға көлік құралын басқару құқығынан айырылады. Ал егер жүргізуші куәлігі бомаса, оны сегіз жыл бойы алу мүмкін болмайды.