Жол ережесіне қатысты қандай өзгерістер енгізілді?

Енді жүк көліктері елді мекен ішінде сағатына 50 шақырым жылдамдықтан артық қозғала алмайды, деп хабарлайды 24KZ. 23 қарашадан бастап елімізде жол ережелеріне кіріктірілген бірқатар өзгерістер күшіне енді. Ішкі істер министрлігінің мәліметінше, жаңа ереже жаяу жүргіншілердің қауіпсіздігін арттырып, жол-көлік оқиғалараның санын азайтуды көздейді. Елдегі жол  ережелеріне тағы қандай өзгерістер мен толықтырулар енгізілді?

Бұл Ақтөбе өңіріндегі «Самара – Шымкент» бағытында болған жантүршігерлік жол апаты. Жүк көлігі мен «Газель» автомобилінің қақтығысуынан 12 адам мерт болды, арасында кәмелетке толмаған екі бала бар. Бірер күн бұрын Батыс Қазақстан облысында да қайғылы жағдай болды. Чапай – Жаңақала – Сайқын автожолының 50 шақырымында болған апаттан 8 адам тіл тартпай кетті. Иә, бұл тек қазан мен қараша айының ақпары. Қыркүйектегі оқыс оқиғаларды қоссақ, опат болғандар саны 100-ден асып жығылады. Полиция дерегінше, биыл адам өлімімен аяқталған жол-көлік оқиғалары 31% өскен.

Биыл елде 13 мың шақырым автожол жөнделуге тиіс. Бірақ жол сапасы жақсарған сайын жолаушылардың қауіпсіздігі де өзекті мәселеге айналып барады. Яғни тақтайдай тегіс жолмен жүйткитіндер көп. Мәселен, жол-көлік оқиғасынан елде 2022 жылы 2425 адам, 23 жылы 2543 адам, 2024 жылы 2579 адам қаза болған. Ал биыл 10 айда 29 мыңнан астам жол-көлік оқиғасы тіркелді. Салдарынан 1912 адам жан тапсырды, 40 мыңнан астамы жарақат алды. Елде жедел-профилактикалық іс-шаралар да тұрақты өткізіліп келеді. Бірақ жолдағы апат азаяр емес. Енді Ішкі істер министрлігі жүргіншілердің қаза болу қаупін азайту үшін жол ережелеріне өзгерістер енгізді.

Ақтоты Боранова, ІІМ Әкімшілік полиция комитетінің ерекше тапсырмалар жөніндегі аға инспекторы:

- Жылдамдықты төмендету жаяу жүргіншілердің қаза болу қаупін азайтуға бағытталған. БҰҰ Дүниежүзілік денсаулық сақтау ұйымының мәліметінше, жылдамдық 60–65 км/сағ болғанда жаяу жүргіншінің қаза болу ықтималдығы 50 км/сағ-пен салыстырғанда 4,5 есе жоғары. Көріну нашарлаған кезде (боран, тұман, қар, жаңбыр) жол-көлік оқиғаларының алдын алу мақсатында колонна жүрісі кезіндегі полиция қызметкерлері мен жол жүрісіне қатысушылардың құқықтары мен міндеттері нақтыланды.

Жаңа ережеде жүк көліктерінің жылдамдығы азайтылды. Сондай-ақ патрульдік көлік құралдары ілесіп жүретін колонналарға қатысты талаптар да жаңартылды. Мәселен, колонна ішінде маневр жасауға, басып озуға немесе өздігінен тоқтауға тыйым салынады. Тізбектегі көлік саны 10-нан асса, екі патрульдік автомен ілесіп алып жүру міндеттелді. Сондай-ақ М2 және М3 санатындағы барлық автобусқа жолаушыларды отырғызу және түсіру үшін аялдамаларда тоқтауға рұқсат етілді.

Ринат Баймолда, заңгер:

- 60-тан асыруға болмайды деген қағида қойып жатыр. Біз оған дұрыс жағынан қарауларыңызды сұраймыз. Өйткені соңғы кездері жол апатанынан көптеген адам қайтыс болып жатыр. Сондай-ақ дене жарақатын алып жатыр. Мемлекет шұғыл түрде осындай өзгерістерді енгізді.

Қазір елде жол апаттарының алдын алу іс-шаралар өткізіліп жатыр. Яғни полиция қызметкерлерінің саны артты. Жылдамдық режимін сақтау, басып озу және қарсы жолаққа шығу талаптарына бақылау күшейтілді. Сондай-ақ жөндеу жүргізіліп жатқан жол бөліктері де қатаң қадағаланады. 

Авторы: Әлішер Әли