​Көпірде қарсы бағытқа шығып, көлікке соқтығысқан жүргізуші 5 жылға сотталды

Астананың қылмыстық істер жөніндегі мамандандырылған ауданаралық соты адам өліміне әкеп соққан жол-көлік оқиғасы (ЖКО) ісі бойынша айыптау үкімін шығарды.

Сот залында жауапкершілікке тартылған азамат К.-ға ҚР Қылмыстық кодексінің 345-бабы 4-бөлігі бойынша (абайсызда екі немесе одан да көп адамның өліміне әкеп соққан жол қозғалысы ережелерін бұзу) айып тағылды.

Іс материалдарына сәйкес, апат 2026 жылдың қаңтарында Астанадағы Сарайшық көпірінде болған.

К. Түркістан көшесінен Бауыржан Момышұлы көшесіне қарай бағыт алып бара жатқан. Сот жүргізушінің осы учаскедегі қозғалыс қарқындылығын ескермегенін, жылдамдықты төмендетпегенін, жол жағдайына мән бермей, рульге ие бола алмай қалғанын анықтады.

Нәтижесінде ол қарсы қозғалыс жолағына шығып кетіп, жүргізуші С.-ның басқаруындағы автокөлікпен соқтығысқан.

ЖКО салдарынан екінші көліктің жолаушылары — М. және А. қаза тапты.

Сотта прокурор айыптауды қолдап, сотталушыға 5 жылға бас бостандығынан айыру жазасын тағайындауды сұрады.

К.-ның өзі тағылған айып бойынша кінәсін толықтай мойындады.

Сот оны кінәлі деп таныды. Кінәні толық мойындау, шынайы өкіну, сондай-ақ жәбірленушілерге келтірілген зиянды толық өтеу қылмыстық жауаптылықты жеңілдететін мән-жайлар ретінде ескерілді.

Бұдан бөлек, сот К.-ның қаза тапқандардың туыстарына барлық шығындарды өтеп, олардың кешірімін алғанын назарға алды.

Сот істен ауырлататын мән-жайларды анықтаған жоқ.

Сот үкімімен К.-ға 5 жыл мерзімге бас бостандығынан айыру жазасы тағайындалды. Сондай-ақ, ол 7 жыл мерзімге көлік құралдарын басқару құқығынан айырылды.

Бүгін, 16:44