Көшеге шыға алмай қалдық : Түркістан облысында мұздай қаруланғандар 17 жастағы жігітті атып кетті

Түркістан облысында түн ішінде атыс болып, оның соңы адам өлімімен аяқталды. Оқиғаға қатысты марқұмның анасы мен жәбірленушілердің бірі айтып берді, – деп хабарлайды Aikyn.kz сайты  Stan.kz ақпарат агенттігіне сілтеме жасап.

Қайғылы жағдай Түлкібас ауданында болған. Бетперде киіп, мұздай қаруланған бұзақылар жайбарақат тұрған жігіттерге оқ жаудырған дейді куәгерлер. Кесірінен оқиға орнында 17 жастағы Төрехан Төреәлі қаза тапқан.

Дәнеркерлеуші болып нәпақа тауып жүрген Төрехан сол кеште көзі ауырып, тамызғы алуға шыққан екен. Алайда ауылдастармен амандасу соңы атысқа ұласып, 17-ге екі ай бұрын толған жігіт туған ағасының қолында жан тапсырды.

Қара жамылған отбасы полицияның екі күннен бері күдіктілер түгілі олар мінген көлікті таппағанына ашынады. Тамағына өксік тығылған Эльмира Айдаралиева баламды жазықсыз өлтіріп кетті дейді. Сөзінше екінші қарашаның кешінде көзі ауырған Төрехан ағасымен аудандағы дәріханаға кеткен екен. Арада екі сағат өткенде әкесі атыс болғанын айтып  хабарласыпты. Жедел Ауруханаға жеткенде олар бір ұлының аман қалғанына қуанғанымен, екіншісінің жансыз денесін көрген.

Видеодан скрин (марқұмның анасы)

“Кейбір балалар қашып үлгерген. Бейқам, ештеңемен шаруасы жоқ балалардың бәрін атқан. Менің балам сол уақытта машинаның астына бүгіліп екі бүктеліп жатып қалған деп естідім. Баламды желкесінен ұстап, шалқасынан түсіріп, жүрек тұсынан атып кетіпті деп естідім. Қасында 17 жасар жолдас баласы болған. Оны да атып өлтіруге оқталған. Ол кезде бандиттердің оғы ада болып қалған екен. Сөйтіп көлігіне мініп кетіп қалған. Ол бала аман қалған”, – дейді марқұмның анасы Эльмира Айдаралиева. 

Түлкібастағы қанды оқиғада төрт жігіт оққа ұшқан. Кәмелет жасына толмаған Төрехан оқиға орнында тіл тартпай кетсе, қалған үш жігіттің аяғы жараланыпты. Олардың бірі қазір амбулаториялық емге жіберілген. Тобығы таңылған жәбірленуші қазір бір өзі емес, бүкіл ауылдың үрейленіп отырғанын айтады. Өйткені күдіктілердің өзі түгілі көлігі де табылмаған дейді.

“Ауылдың балалары болғаннан кейін амандасып, сөйлесіп тұрған кезімде аптекадан шықты да атты. Құладық. Жанымызға келіп, тарсылдатып атып-атып кетті. Олар маскамен келген кісілер. Түрлерін де білмейміз. Көшеге де шыға алмай қалдық. Полицейлер “Казір көшеге шықпай тұра тұрыңдар. Тағы келіп атып кете салуы мүмкін” деп қорқып жатыр ғой”, – дейді жәбірленуші.

Куәгерлер сөзінше бұзақылар шабуылға бетпердемен, дайындалып келген. Көліктен түскен үшеудің де қолында қару болған дейді. Ешкіммен ерегіспедік деген олар не үшін оққа ұшқанын өздері де түсіне алмай әлек. Болжамдары бойынша қаскөйлер өзге адамды көздеп келіп, нысанадан жаңылған.

“Оқиға орнына аудандық полиция бөлімінің басшылығы мен жедел-тергеу тобы дереу шықты. Іс-шаралар барысында аз уақыт ішінде күдіктілердің жеке басы анықталды. Олардың бірі ұсталып, қамауға алынды. Осы факті бойынша "Адам өлтіру" бабымен қылмыстық іс қозғалды. Болған оқиғаның барлық мән-жайларын және екінші қатысушының орналасқан жерін анықтауға бағытталған қажетті тергеу әрекеттері жүргізілуде”, – деп хабарлады Түркістан облысының полиция департаменті.

Жараланған жігіттер оқиға орнына жедел жәрдемді де шақырудан тайсалған. Содан ауруханаға өз көлігімен жетіпті.