Куала Лумпурдағы туристік көрмеде Алматы павильонына 10 мыңнан астам адам келді

Үш күн ішінде Visit Almaty павильонына 10 мыңнан астам тіркелген қонақ келді, – деп хабарлайды Aikyn.kz.

Алматы Малайзиядағы ең ірі туристік көрмеге алғаш рет жеке павильонмен қатысты. Келушілерге Қазақстанның мәдениеті мен дәстүрін таныстыратын мәдени және гастрономиялық бағдарлама ұсынылды.

Көрме алаңында қазақ музыканттары мен бишілері өнер көрсетті. Қонақтар ұлттық тағамдардан дәм татып, дәстүрлі кәдесыйлармен танысты. Көрме қорытындысы бойынша Алматы павильоны үздік мәдени бағдарлама үшін марапатқа ие болды.

MATTA Fair аясында Almaty Tourism Day іс-шарасы да өтті. Оған Малайзияның Туризм, өнер және мәдениет министрлігінің, Малайзия туристік және туроператорлық агенттіктер қауымдастығының, әуе компанияларының, сондай-ақ екі елдің туристік бизнес өкілдері қатысты.

Іс-шара барысында Алматының Туризм басқармасы мен Малайзия туристік және туроператорлық агенттіктер қауымдастығы арасында өзара түсіністік туралы меморандумға қол қойылды. Құжат туристік бағыттарды бірлесіп ілгерілетуге, ақпарат алмасуға және іскерлік байланысты нығайтуға бағытталған.

Сонымен қатар Қазақстан мен Малайзияның 50-ден астам туристік компаниясының өкілдері келіссөздер жүргізді. Кездесулерде Алматыны бірлесіп ілгерілету, жаңа туристік өнімдер әзірлеу және екі ел арасындағы туристер санын арттыру мәселелері талқыланды.

2025 жылы Алматыға Малайзиядан келген туристер саны 23%-ға артты. Көрмеге қатысу және қол жеткізілген келісімдер Алматыны Малайзияның туристік нарығында одан әрі ілгерілетуге жол ашады.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.