Алматы Дүниежүзілік туристік көрмеде әлем жұртшылығын қонаққа шақырды

Лондон төрінде бауырсақтың иісі аңқып, қоңыр домбыраның күмбірлеген үні естілді.

Қазақстан Дүниежүзілік туристік көрмеге қатысып, әлем жұртшылығын қонаққа шақырды. Стендті көруге келген меймандар  тағамдардан дәм татып, ұлттық киімдерді киіп көрді, батырлармен суретке түсті.

Ғалымжан Қараманұлы, тілші:

- Қазақстан стенді Корея және Германиямен көрші орналасқан. Шынын айтқанда, бәсеке жоғары, бірақ көрмеге келушілердің біздің елімізге деген қызығушылығы артпаса, кемімей отыр. Виза, ұшу рейстері, жаңа бағыттар туралы сұрап жатқандар көп. Оларға сондай-ақ тылсым табиғатымыз, ұлттық тағамдарымыз, мәдениетіміз — бәрі, бәрі қызық. 

Қазақстандық павильон әлемге бұл жолы Алматыны паш етті. Көрмеге қатысушылар таумен тілдескен ғажап қала туралы кең мағлұмат алды. Ұйымдастырушылар мәдени бағдарламаның мазмұнына да ерекше мән берген. Қонақтар квинтеттің орындауындағы Құрманғазының күйлерін тыңдап, қазы мен Алматының апортынан дәм татты. Бүгінде мегаполис еліміздің ғана емес, бүкіл Орталық Азияның да брендіне айналып келеді: заманауи, рухы биік, табиғаты мен мәдениеті үндескен қала.

Еркебұлан Абиханов, Алматы қаласы туризм басқармасының бөлім басшысы: 

- Басқа елдердің туроператорларымен, туристік өкілдерімен танысып, келісім-шарттарға отыру біздің ең басты мақсатымыз. Сол жұмыстардың бәрін тәмамдап, Алматы қаласына максималды түрде туристерді алып кіргізу жұмыстарын жасап жатырмыз.

Өткен жылы Алматыға 2,5 миллионнан астам турист ат басын бұрған. Соның 800 мыңы алыс шетелден келгендер. Арасында Үндістан, Қытай және Еуропа елдерінің саяхатшылары көп. Оларды әсіресе халқымыздың бай тарихынан сыр шертетін қазақтың қолөнері мен әшекей бұйымдары қызықтырады.

Салтанат Өрісбай, қолөнерші: 

- Лондон қаласына Қазақстанның қолөнерін көрсетуге келдік. Мына жерде шекелік, мынау моншақ мойынға тағатын, мынау белдік белге тағатын. 

Дүниежүзілік туристік көрме туроператорлармен, әуе компанияларымен және медиа өкілдерімен байланыс орнатуға мол мүмкіндік береді. Сондай-ақ Алматыда тұрақты туризм және қалалық инфрақұрылым саласында жасалып жатқан жобалармен әлемді таныстыруға да жағдай жасайды. 

Эмма Хикман, британ туристік компаниясының өкілі:

- Мұнда біз туристерді Ұлыбританиядан Қазақстанға жеткізу жолдарын талқылауға келдік. Меніңше, британ саяхатшыларының сіздің өңірге деген қызығушылығы артып отыр. Табиғаттарыңыз керемет. Менің клиенттерім жаңа бағыттар бойынша қыдырғанды ұнатады. 

Туризм мен саяхат индустриясындағы әлемдегі ең ірі алаң 180-нен астам елдің өкілін жинады. Биылғы форум өзгеріс дәуіріндегі саяхат концепциясын қайта қарау мәселесіне мән берді. Сондай-ақ тұрақты туризм, цифрлық шешімдер, инклюзивтік даму және геоэкономиканың жаһандық туристік бағыттарға ықпалы тақырыптарын қамтып отыр.

Ғалымжан Қараманұлы