Каспийдегі трагедия 11 жылдан кейін қайталанды: 2015 жылғы жаттығуда не болды

Ақтауда Каспий теңізіндегі әскери жаттығу кезінде бүгін, 24 қыркүйекте тоғыз әскери қызметшінің қаза табуы осыдан 11 жыл бұрын Каспийде болған тағы бір қайғылы оқиғаны еске түсірді. 2015 жылғы 18 қыркүйекте "Орталық-2015" оқу-жаттығуы кезінде теңізге төрт әскери қызметші батып кеткен болатын, деп хабарлайды Tengrinews.kz.

Мән-жайы

11 жыл бұрын Ақтауда "Орталық-2015" оқу-жаттығуының екінші кезеңі өткен болатын. Теңіз десантын түсіру эпизоды кезінде бортында 52 әскери қызметшісі бар алты БТР-80 теңізге шыққан. Жаттығулар "Оймаша" полигонынан шамамен бес шақырым жерде өткен.

lada.kz мұрағатынан алынған фото
Теңізбен 150 метрдей жүріп өткеннен кейін, қатты жел мен көтерілген биік толқынның салдарынан техника суға бата бастаған. Соның салдарынан төрт әскери қызметші қаза тапты.

Сол кезде Қорғаныс министрі қызметін атқарған Иманғали Тасмағамбетов оқиғаның егжей-тегжейі мен себептерін толық анықтау үшін шұғыл түрде арнайы топ құрып, оқиға орнына ұшып баруды тапсырды.

Сол күні қаза тапқан төрт әскери қызметшінің есімдері белгілі болды: 19 жастағы Бауыржан Жолдабай, ол Оңтүстік Қазақстан облысы (Түркістан облысы) Созақ ауданынан шақырылған, сондай-ақ оның құрдасы Асылжан Махамбетов Атырау облысы Құлсары ауданынан, 23 жастағы Замир Әділов Алматы облысы Еңбекшіқазақ ауданынан және 19 жастағы Бағытжан Қалыбай, ол Атырау облысы Мақат кентінен қызметке шақырылған болатын.

Асылжан Махамбетов пен Бағытжан Қалыбайдың әскерден қайтуына бір ай қалған еді.

2015 жылғы 19 қыркүйекте төрт әскери қызметшінің қаза болу фактісі бойынша Қазақстан Республикасы Қылмыстық кодексінің 453-бабы 2-бөлігі – "Ауыр зардаптарға әкеп соққан қызметке салғырт қарау" бабымен қылмыстық іс қозғалды.

ҚР Қорғаныс министрлігі баспасөз қызметінің мұрағаттық фотосы

Жұмыс нәтижелері мен алдын ала тергеу қорытындысы бойынша Қорғаныс министрі "Батыс" өңірлік қолбасшылығының қолбасшысы полковник Мұрат Нұғмановты қызметінен шеттету және оны қызметтен босату туралы шешім қабылдады, сондай-ақ "Батыс" өңірлік қолбасшылығы қолбасшысының бірінші орынбасары - штаб бастығы полковник Ризат Қолпашевты, "Батыс" өңірлік қолбасшылығы қолбасшысының жауынгерлік дайындық жөніндегі орынбасары полковник Мерген Қапашевты, теңіз жаяу әскерлері бригадасының командирі подполковник Ербұлат Толықбаевты қызметінен босатты.

БАҚ Ақтауда суға кеткен теңіз жаяу әскерлерінің фотосын жариялады

2015 жылғы 21 қыркүйекте қаза тапқан әскери қызметшілердің отбасылары мемлекеттік бюджеттен материалдық өтемақы ретінде 1,5 миллион теңгеден алатыны белгілі болды.

2015 жылғы қазанда Қорғаныс министрлігінде алқа мәжілісі өтіп, онда әскери қызметшілердің қаза болуын тергеу қорытындылары айтылды. Қорғаныс министрлігінің Бас инспекциясы Ақтаудағы төтенше жағдайдың мән-жайын талдады.

Қорғаныс министрлігінің алқа мәжілісі - 2015 жыл. Ведомствоның баспасөз қызметінің фотосы

Негізгі себептер ретінде ережелерді сақтамау және алгоритмдердің орындалмауы, жеке құрамның дайындығының жеткіліксіздігі және бақылаудың әлсіздігі аталды.

Ақтауда әскерилердің қаза болуын тергеу барысы Қорғаныс министрлігінде талқыланды

Каспий теңізіндегі қайғылы оқиғадан бір жыл өткен соң – 2016 жылғы 25 қарашада – Ақтауда жаттығу кезінде төрт мерзімді қызметтегі сарбаздың қаза болуына қатысты іс бойынша үкім шықты. Ол кезде сот алдында лауазымды тұлғаларды қосқанда алты адам жауап берді.
Олардың барлығына ҚР ҚК 453-бабының 2-бөлігі бойынша "Ауыр зардаптарға әкеп соққан қызметке салғырт қарау".

"Батыс" өңірлік қолбасшылығының экс-қолбасшысы полковник Мұрат Нұғмановты, теңіз жаяу әскерлері бригадасының бұрынғы командирі подполковник Ербұлат Толықбаевты және 25744 әскери бөлімі теңіз жаяу әскерлері командирінің орынбасары Рашид Жылқайдаровты сот жазасын қоныс колониясында өтеумен 2,5 жылға бас бостандығынан айыруға үкім етті.

25744 әскери бөлімінің екінші батальоны бесінші ротасының теңіз жаяу әскерлері екінші бөлімшесінің командирі, кіші сержант Абай Баймұратов жазасын қоныс колониясында өтеумен 1,5 жылға бас бостандығынан айырылды.

25744 әскери бөлімінің теңіз жаяу әскерлері взвод командирі, аға лейтенант Бауыржан Төлегенов пен 25744 әскери бөлімінің екінші батальоны бесінші ротасының теңіз жаяу әскерлері үшінші бөлімшесінің командирі, кіші сержант Ерасыл Көбеген кінәлі деп танылып, алты айға бас бостандығынан айырылды. Оларға қатысты Қылмыстық кодекстің 63-бабы қолданылып, нәтижесінде судья оларға шартты мерзім тағайындады. Іс Ақтау гарнизонының әскери сотында қаралды.

Еске салсақ, бүгін, 24 қыркүйекте Маңғыстау облысында Қазақстан Қарулы күштері Әскери-теңіз күштерінің жаттығуы кезінде әскери қызметшілерді теңізге ағызып әкетті. Төтенше жағдай Каспий теңізінің жағалауында ауа райының күрт бұзылуы мен желдің күшеюі аясында оқу-жауынгерлік тапсырманы орындау кезінде болды.

Алдын ала мәліметтер бойынша, 19 әскери қызметшіні теңіз толқыны алып кеткен. Олардың тоғызы қаза тапты, үшеуі құтқарылды, олардың бірі ауруханаға жатқызылды. Қалғандарын іздестіру жұмыстары жалғасып жатыр. Оқиға орнына құтқару қызметтерінің күштері мен құралдары жіберілді.

Ақтау гарнизонындағы оқу-жаттығу кезінде әскери қызметшілердің қаза табу фактісі бойынша сотқа дейінгі тергеп-тексеру басталды.

Бізді Google-дың негізгі дереккөздер тізіміне қосыңыз