Нұрай Серікбайдың өлімі: апелляция шешім шығарды

Шымкентте 24 қыркүйекте 21 жастағы Нұрай Серікбайдың өліміне қатысты іс бойынша апелляциялық алқа отырысы өтті, - деп хабарлайды Tengrinews.kz тілшісі.

Қалалық сот мәліметінше, сотталғанның адвокаттары өз шағымдарында сот үкімін өзгертуді, Ш. Аймаханды ҚР Қылмыстық кодексінің 125-1-бабы 1-бөлігі ("Некеге тұруға мәжбүрлеу") бойынша ақтауды, 99-баптың 1-бөлігі ("Адам өлтіру") бойынша кінәлі деп танып, оған әділ жаза тағайындауды сұраған.

Жәбірленуші тарап апелляциялық шағымында моральдық зиян сомасын 25 миллион теңгеден 10 миллиард теңгеге дейін көбейтуді сұрады.

Прокурор үкімді өзгеріссіз қалдыруды, ал апелляциялық шағымдарды қанағаттандырмауды сұрады.

"Алқа істі қарап, бірінші сатыдағы соттың Ш. Аймаханның кінәлі екені туралы тұжырымдарымен келісті, ҚПК-нің 433-бабында көрсетілген сот үкімінің күшін жоюға немесе өзгертуге негіз таппады. Осыған байланысты 2024 жылғы 24 қыркүйектегі қаулымен үкім өзгеріссіз қалдырылды. Сот актісі заңды күшіне енді", - делінген хабарламада.

"Кісі өлтіру", "Некеге тұруға мәжбүрлеу" және "Сталкинг"

Судья Саммидин Темиралиев Аймаханды Қылмыстық кодекстің бірден үш бабы бойынша кінәлі деп танып, әр эпизод бойынша мынадай жаза тағайындады:

99-баптың 2-бөлігі 5-тармағы "Аса қатыгездікпен жасалған адам өлтіру" бойынша – өмір бойына бас бостандығынан айыру; 125-1-бап "Некеге тұруға мәжбүрлеу" бойынша – 2 жылға бас бостандығынан айыру; 115-1-бап "Сталкинг" бойынша – 200 сағаттық қоғамдық жұмыс.

"Шерхан Аймахан өмір бойына бас бостандығынан айырылып, жазасын қылмыстық-атқару жүйесінің төтенше қауіпсіздік мекемесінде өтеу тағайындалсын", – деп төрағалық етуші судья үкімді оқыды.

Бұған дейін прокурор Мадияр Әбілқасымов сотталушыға өмір бойына бас бостандығынан айыру жазасын сұраған болатын.

Іс хроникасы

Қайғылы оқиға 11 қаңтарда болды. Желіде тараған бейнебақылау камераларындағы жазбалардан ер адамның қызды аңдып жүргенін, қыз қашуға тырысып, қарсылық көрсеткенін, содан кейін ер адам оған пышақ жарақатын салып, оқиға орнынан қашып кеткенін көруге болады. 13 қаңтарда күдікті – өңірдің 28 жастағы тұрғыны қаладан 10 шақырым жерде ұсталды.

Ұсталған адам туралы Нұрайдың ағасы Сұлтан бөліскен мәліметтер БАҚ пен әлеуметтік желілерде ашу толқынын тудырды.

Күдікті оның қарындасын тойда танысқан 2024 жылдың жазынан бастап аңдығаны белгілі болды. Қыз оның тым белсенді көңіл білдіруінен сыпайы түрде бас тартқан, бірақ қазанда ер адам түбегейлі әрекеттерге көшкен.

Бізді Google-дың негізгі дереккөздер тізіміне қосыңыз

Қосу