Күріш 205 теңгенің орнына 556 теңгеден: Қарағандыда 160 пайыздық сауда үстемесі анықталды

Қарағанды облысында әлеуметтік маңызы бар азық-түлік бағасын негізсіз асыра көрсету фактілері анықталды. Дүкендердің бірінде келісі 205 теңгеден сатып алынған күріш тұтынушыларға 556 теңгеден сатылған. Сауда үстемесі 160 пайызды құрады, деп хабарлайды Tengrinews.kz Сауда және интеграция министрлігінің баспасөз қызметіне сілтеме жасап.

Заң бұзушылықты Қарағанды облысы бойынша сауда және тұтынушылардың құқықтарын қорғау департаментінің мамандары анықтады. Кәсіпкер әкімшілік жауапкершілікке тартылып, содан кейін күріш бағасы 235 теңгеге дейін төмендетілді.

Бұл өңірде анықталған бағаны қымбаттатудың жалғыз жағдайы емес.

Мәселен, қатты ірімшік 3 353 теңгеден сатып алынып, сауда желілеріне 5 517 теңгеден жеткізілген. Үстеме баға 64 пайызды құрады. Тексеруден кейін баға 3 855 теңгеге дейін, яғни 1 662 теңгеге арзандады.

Тағы бір жағдай қара шайға қатысты. Сатып алу бағасы 472 теңге болса, ол 1 079 теңгеден сатылып, сауда үстемесі 130 пайызға жеткен. Жауапкершілікке тартылғаннан кейін баға 496 теңгеге дейін түсті.

Сондай-ақ тауық фаршының да бағасы төмендетілді. Ол 1 655 теңгеден сатып алынып, 45 пайыздық үстемемен 2 400 теңгеден сатылып келген. Тексеруден соң оның бағасы 1 903 теңгені құраған.

Ресми мәліметтерге сәйкес, жыл басынан бері Қарағанды облысында 170 кәсіпкерлік нысаны тексерілді. Олардың 155-і әкімшілік жауапкершілікке тартылды.

Олардың қатарында базарларда жұмыс істейтін 44 көтерме жеткізуші және 11 көтерме-бөлшек сауда дүкені бар. Бұл өткен жылдың сәйкес кезеңімен салыстырғанда 39,6 пайызға артық: 2024 жылы 111 кәсіпкерлік нысаны жауапқа тартылған болатын.

Жыл басынан бері салынған әкімшілік айыппұлдардың жалпы сомасы 4 миллион теңгеден асады.

Тексерістер барысында сауда саласында 11 заң бұзушылық және салық заңнамасын бұзудың 11 фактісі анықталды. Сонымен қатар санитарлық-эпидемиологиялық бақылау органдары екі жедел ден қою шарасын қабылдады.

Мамандар бақылау-кассалық машиналардың қолданылуын, баға көрсеткіштерінің болуын, әлеуметтік маңызы бар азық-түлікке қойылатын шекті сауда үстемесінің сақталуын, сондай-ақ тамақ өнімдерін таңбалау және сату талаптарын тексерді.

Департамент өкілдері анықталған заң бұзушылықтар жойылғанын және бірқатар әлеуметтік маңызы бар тауарлардың бағасы төмендетілгенін хабарлады. Өңірдегі бағаны бақылау жұмыстары жалғасып жатыр.

Google News арқылы жаңалықтарымызды қадағалаңыз