KUS ісі: Қарабатандағы бөгетке қатысты үкім заңды күшіне енді

Атырау облыстық сотының қылмыстық істер жөніндегі сот алқасы Қарабатан ықшамауданында су тасқыны кезінде салынған бөгет құрылысына байланысты істің фигуранттары берген апелляциялық шағымдарды қанағаттандырудан бас тартты.

Екінші сатыдағы сот қаулысы 10 сәуірде шыққан. Осылайша №2 Атырау қалалық сотының 2025 жылғы 23 желтоқсанда шыққан үкімі өзгеріссіз қалдырылды.

Бұл іс «Karabatan Utility Solutions» ЖШС компаниясының топ-менеджерлеріне, мердігер ұйым өкілдеріне және оларға байланысты тұлғаларға қатысты. Тергеу дерегінше, Қарабатан арнайы экономикалық аймағында су тасқыны кезінде салынған топырақ бөгет құрылысы барысында Атырау облысында төтенше жағдайға байланысты бөлінген бюджет қаражаты ұрланған.

Тергеу нұсқасына сәйкес, 63 миллион теңгеден астам залал келтірілген.

Бұл сот процесі 2024 жылғы 2 мамырда басталған. Іс бойынша «Karabatan Utility Solutions» ЖШС басқарма төрағасының экономика және қаржы жөніндегі орынбасары Бақытжан Қалдыбаев, өндіріс жөніндегі орынбасары Жеңісбек Лұқпанов, «Атырау жылу желілері» АҚ вице-президенті Асхат Дүйсенғалиев, «БатысҚұрылысИнвест» ЖШС директоры Саламат Жанғалиев және жеке кәсіпкер Тимур Бисембаев жауапқа тартылған.

Сот сондай-ақ «KUS» ЖШС-нің бұрынғы басқарма төрағасы И. Ильин мен капиталдық құрылыс департаментінің директоры А. Ахмедовтың әрекеттерінде қылмыстық құқық бұзушылық белгілері бар екендігі туралы жеке қаулылар шығарды. Бұл қаулылар Атырау облысы бойынша ҰҚК департаментіне қарауға жолданды.

Қалдыбаев пара алғаны және сеніп тапсырылған мүлікті аса ірі көлемде ысырап еткені үшін айыпталды. Жанғалиев пен Бисембаевқа пара беру және қаражатты жымқыру айыбы тағылды. Тергеу нұсқасына сәйкес, Асхат Дүйсенғалиев көмекші ретінде әрекет етіп, параның бір бөлігін алған.

Бірінші сатыдағы сот үкіміне сәйкес, «Karabatan Utility Solutions» ЖШС басқарма төрағасының міндетін атқарушы Бақытжан Қалдыбаев «БатысҚұрылысИнвест» ЖШС директоры Саламат Жанғалиевпен алдын ала сөз байласу арқылы бөгет құрылысына бөлінген қаражатты иемденген. Сот сондай-ақ бұл жымқыру Асхат Дүйсенғалиев пен Тимур Бисембаевтың көмегімен жасалған деген қорытындыға келді.

Бұл істің фигуранттарының бірі — Жеңісбек Лұқпанов сот процесі барысында қылмыстық жауапкершіліктен босатылды. Ж.Лұқпановтың адвокаты Алмат Базриденовтің айтуынша, мемлекеттік айыптаушы оған тағылған айыптан бас тартты, себебі сотта оның қаражат жымқыруға қатысы бар деген уәждер расталмады. Жасырын тергеу әрекеттерінің нәтижелері де оның әрекеттерінде қылмыстық құқық бұзушылық белгілері жоқ екенін көрсетті.

Осыған байланысты сот 2025 жылғы 23 желтоқсанда Лұқпановқа қатысты қылмыстық құқық бұзушылық құрамының болмауына байланысты істі тоқтату туралы қаулы шығарды. Аталған қаулы 2026 жылғы 10 сәуірде заңды күшіне енді.

2025 жылғы 23 желтоқсанда Лұқпановқа қатысты қылмыстық іс қылмыс құрамының болмауына байланысты тоқтатылды. Бұл шешім апелляциялық шағым қаралғаннан кейін заңды күшіне енді.

Апелляциялық шағымдарда сотталғандар мен олардың адвокаттары кінә дәлелденбегенін, ал бірінші инстанциядағы сот істі біржақты қарағанын алға тартты. Қорғау тарапы мынадай уәждер келтірді:  

— бөгет құрылысына төлем оның көлеміне емес, топырақ тасымалдау рейстерінің санына қарай жүргізілген;  
— мердігер барлық жұмысты толық орындаған;  
— тергеу барысында заң бұзушылықтарға жол берілген;  
— Қалдыбаев мемлекеттік функцияларды орындауға уәкілеттік берілген тұлғаларға теңестірілмейді;  
— Дүйсенғалиев пен Бисембаевтың қаражат жымқыруға қатысы дәлелденбеген.

Сонымен қатар қорғау тарапы Тимур Бисембаевтың «Karabatan Utility Solutions» ЖШС-де де, «БатысҚұрылысИнвест» ЖШС-де де жұмыс істемегенін, компаниялардың қаржылық-шаруашылық қызметіне қатыспағанын және тапсырыс беруші мен мердігер арасындағы келісімшарттарға қол қоймағанын көрсетті.

Осы негіздермен қорғау тарапы айыптау үкімін жойып, ақтау үкімін шығаруды сұрады.  

Алайда апелляциялық сатыдағы сот бірінші инстанция үкімі іс материалдарындағы дәлелдерге сүйене отырып, заңды әрі негізді түрде шығарылған деген қорытындыға келді. Сотталғандар мен олардың қорғаушыларының шағымдары қанағаттандырылмады.

Айнұр САПАРОВА

Бүгін, 10:57