Лавров Ресей активтері тәркіленген жағдайда ЕО ға қарсы шара қолданылатынын ескертті

АСТАНА, 9 қараша – Sputnik. Ресей сыртқы істер министрі Сергей Лавров РИА Новостиге берген сұхбатында егер Батыс Ресейдің бұғатталған активтерін Киевке берсе, тиісті түрде жауап берілетінін мәлімдеді.

"Ресей ұлттық мүдделеріне сүйеніп және өзіне келтірілген зиянның орнын толтыру қажеттігін ескере отырып, кез келген қарақшылық әрекетке тең дәрежеде лайықты жауап береді", — деді министр.

"Брюссель мен басқа да батыс елдерінің астаналары әлі де райынан қайтып, жоспарланған авантюрадан бас тарта алады", — деп түйіндеді ол.

Украинадағы қақтығыс басталғаннан кейін ЕО және G7 елдері Ресейдің валюта қорының жартысына жуығын – 300 миллиард еуроны бұғаттады. ЕО-да 200 миллиард еуродан астам қаражат, оның негізгі бөлігі Бельгияның Euroclear шоттарында жатыр. Еурокомиссия өкілі Маркус Ламмерт тамыз айының соңында Ресейдің тыйым салынған активтерінен түскен 9 миллиард еуроның қаңтар айынан бастап Киевке жіберілгенін хабарлады.

Ресей АҚШ пен НАТО Украинадағы қақтығысқа қару-жарақ жеткізу арқылы ғана емес, сонымен бірге Ұлыбритания, Германия, Италия және басқа елдерде Украина қарулы күштерін дайындау арқылы тікелей қатысып жатыр деп бірнеше рет мәлімдеген. Кремль Батыстың Украинаға қару-жарақ жеткізуі келіссөзге ықпал етпейтінін және оның кері әсері болатынын айтты.