Иран әскери шабуыл болған жағдайда жауап беретінін ескертті

БҰҰ жанындағы Иранның тұрақты өкілі Амир Саид Иравани әскери шабуыл жасалған жағдайда Тегеран БҰҰ Жарғысының 51-бабына сәйкес өзін-өзі қорғау құқығын пайдаланып, «шешімді әрі тең дәрежеде» жауап беретінін айтты, деп хабарлайды АА.

Иравани бұл туралы БҰҰ Бас хатшысы Антониу Гутерришке және Қауіпсіздік Кеңесінің төрағасына жолдаған хатында мәлімдеді.

Хатта ол АҚШ тарапынан күш қолдану қаупі жалғасып отырғанын, бұл БҰҰ Жарғысы мен халықаралық құқықты ашық бұзу екенін және аймақты жаңа дағдарыс пен тұрақсыздыққа ұрындыру қаупін тудыратынын атап өтті.

Иравани АҚШ президенті Дональд Трамптың мәлімдемелері «нақты шабуыл қаупін қамтиды» деп, оның салдары аймақ үшін апатты болып, халықаралық бейбітшілік пен қауіпсіздікке елеулі қатер төндіретінін жеткізді.

Ол Иранның БҰҰ қағидаттарына және дипломатиялық шешімдерге берік екенін, АҚШ үкіметімен ядролық бағдарламаға қатысты маңызды әрі адал келіссөздер жүргізіп жатқанын айтты.

Ираванидің сөзінше, егер АҚШ та келіссөздерге шынайы әрі жауапкершілікпен қарап, БҰҰ қағидаттары мен халықаралық құқықты құрметтесе, тұрақты әрі теңгерімді шешімге қол жеткізу мүмкін.

Осыған байланысты ирандық дипломат Қауіпсіздік Кеңесі мүшелерін және Бас хатшыны АҚШ тарапынан жасалып отырған «күш қолдану туралы заңсыз қауіп-қатерді» дереу тоқтатуға, олардың БҰҰ Жарғысы бойынша міндеттемелерін орындауға және ауыр салдары бар әскери қақтығысқа әкелуі ықтимал кез келген әрекеттен бас тартуға шақырды.

Иравани Қауіпсіздік Кеңесі күш қолдану қаупін қалыпты жағдайға айналдыруға жол бермеуі тиіс екенін, мұндай заңсыз әрекеттерге жауап берілмесе, «келесі кезекте кез келген басқа егеменді мемлекет – БҰҰ мүшесі болуы мүмкін» екенін атап өтті.

Ол тағы да әскери шабуыл жасалған жағдайда Иран БҰҰ Жарғысының 51-бабына сәйкес өзін-өзі қорғау құқығын пайдаланып, шешімді әрі тең жауап беретінін айтты.

Ираванидің айтуынша, мұндай жағдайда «аймақтағы қарсыластың барлық базалары, нысандары мен активтері заңды мақсатқа айналады», ал АҚШ «болжауға келмейтін және бақылауға жатпайтын салдар үшін толық әрі тікелей жауапкершілік» арқалайды.

Бүгін, 12:04