ЛГБТ ны насихаттау заңмен қудаланбақ

Дәстүрлі емес жыныстық қатынастарды насихаттау заңмен қудалануы мүмкін.

Мәжіліс депутаттары жұмыс тобында осындай әрекет үшін жауапкершілікті енгізетін заңнамалық түзетулерді мақұлдады. Ұсынылған түзетулерге сәйкес мұндай іс-әрекеттер әкімшілік құқық бұзушылық туралы кодекс бойынша жазаланады. БАҚ-та немесе әлеуметтік желілерде ЛГБТ насихаттау белгілері бар заңсыз контентті жариялағаны және таратқаны үшін 20 Айлық есептік көрсеткіш, яғни 78 640 теңге мөлшерінде айыппұл салынады. Егер әрекет бір жыл ішінде қайталанса, онда 40 АЕК мөлшерінде айыппұл салынады  немесе 10 тәулікке дейін әкімшілік қамауға алынады. Мәжіліс депутаттары  Қазақстан Республикасындағы баланың құқықтары туралы заңның 34-бабы «Ұлттық және әлемдiк мәдениетке баулу» туралы бөлігіне өзгерістер енгізуді көздейді.

Еділ Жаңбыршин, ҚР Парламенті Мәжілісінің депутаты:

- Мысалы, «Ұлттық және әлемдік мәдениетке баулу» деген 34-бап бар. Соның ішінде айтылған порнографияны, зорлық-зомбылықты немесе қорлауды, адам психикасына әсер ететін, әсіресе балаларды құқық бұзушылыққа итермелейтін мәдени, әдеби және басқа да шараларды пайдалану заңмен қудаланады деп көрсетілген. Соның ішінде біз теріс, дәстүрлі емес жыныстық қатынастарды насихаттауды қосып отырмыз.