Қазақстанда ЛГБТ ны насихаттауға тыйым салынады

Мәжіліс Қазақстанда ЛГБТ-ны насихаттауға тыйым салу жөніндегі түзетуді мақұлдады. Бұл өзгеріс архив ісі мәселелері бойынша заң жобасына енгізілген, деп хабарлады парламенттің төменгі палатасының баспасөз қызметі.

Заң жобасына сәйкес, жаңа норма балаларды денсаулығына және дамуына зиян келтіретін ақпараттан қорғау мақсатында енгізіледі. Түзету қоғамдық орындарда, БАҚ-та, телекоммуникациялық желілерде және онлайн платформаларда педофилия мен дәстүрлі емес сексуалды ориентацияны насихаттайтын ақпаратты таратуға тыйым салады.

Депутат Наталья Дементьеваның айтуынша, түзету әлеуметтік желілерде, фильмдерде және жарнамада ЛГБТ-ны насихаттауға бағытталған. Елнұр Бейсенбаев бұл өзгерістер баланың құқықтары, жарнама, байланыс, мәдениет, білім, кино, БАҚ және онлайн платформалар туралы тоғыз заңға қатысты екенін атап өтті.

Депутаттар заң жобасы ЛГБТ қауымдастығының бар болуына емес, ақпараттың қоғамдық таралуына ғана шектеу енгізетінін жеткізді. Заң жобасы Сенатта мақұлданып, Президенттің қол қоюымен күшіне енеді.

Бүгін, 14:01