Лизинг пен автонесиенің айырмашылығы қандай?

Мемлекет басшысы жақында Үкіметке экономикалық ахуалды тұрақтандыру үшін нақты шаралар әзірлеуді тапсырды. Президент пәрменінен кейін Үкімет бірқатар маңызды шешімдер қабылданғанын хабарлаған. Соның бірі - халықтың жаңа көлік тізгіндеуіне мүмкіндік беретін жеке азаматтарға лизингпен көлік рәсімдеу мүмкіндігі, деп жазады Egemen.kz.

Фото: pexels.com

Бұған дейін елімізде жеңіл және арнайы көліктер лизингпен заңды өкілдерге ғана беріліп келген. Енді жаңа ережелер жеке азаматтарға да қатысты болмақ. 

29 қазан күні Сауда және интеграция министрлігі көлікті лизингке алуға мүмкіндік беретін сауда ережелеріне енгізілген өзгерістер  туралы «Ашық үкімет» порталында жариялады. Десе де жобада лизингпен жаңа автокөлік алу тетігі мен ережелері, шарты әлі нақтыланбаған.

Жоба жеке тұлғаларға көлікті пайдалану үшін лизинг шарты негізінде оны кейін меншікке сатып алу немесе лизинг берушіге қайтаруды ұсынған.

Бұл механизм азаматтар үшін автокөліктердің қолжетімділігін арттыруға, ішкі автолизинг нарығын дамытуға және бәсекелестік ортаны нығайтуға ықпал етеді.

Лизингтің жеңілдетілген несиеден несі артық?

Лизинг пен автонесиенің басты айырмашылығы – меншік құқығы. Автонесие рәсімделгенде көлік бірден сатып алушының атына тіркеліп, банк кепілдігінде болады. Ал лизингте көлік сатушы компанияның меншігінде қалады. Оны рәсімдеуші жалға алушы санатында болып, төлемді де осы негізде жасайды. 

Төлем құрылымында да ерекшелік бар. Автонесиеде көлік құны мен пайызы ай сайын төленсе, лизингте айына оның амортизация шығындары өтеледі. Лизинг мерзімі біткенде қалдық соманы төлеп, көлікті меншігіңізге өткізе аласыз. 

Бастапқы жарна құю жүйесінде де өзгешеліктер бар. Автонесиемен көлік аларда, әдетте, 10 – 30 пайыз бастапқы жарна талап етіледі. Лизинг жүйесінде төменірек жарна талап етілуі мүмкін, кейде, тіпті мұндай шарт болмайды. 

Лизингпен көлік алған азамат келісімшарт мерзімі біткеннен кейін көлікті қайтаруға немесе өзінде қалдыруға құқылы. Автонесие негізінде көлік иеленгендерде мүлік өзінде қалады.