Майталман маман, тәжірибелі тәлімгер

Қайырғали Сисекенов – Батыс Қазақстан электржелілік компаниясында 35 жыл үзіліссіз еңбек етіп келе жатқан майталман жүргізуші. Өткен жылы қарапайым еңбек адамының маңдай тері жоғары бағаланып, ІІІ дәрежелі «Еңбек даңқы» орденімен марапатталды.

Тайпақ өңірінде 1965 жылы дүниеге келген Қайырғали Жұмаұлының еңбек кітапша­сында көп жазба жоқ. 1991 жыл­ғы сәуірде Батыс Қазақстан аймақтық электрже­лілік компаниясының механикаландыру және автомобиль көлігі қызметіне жүргізуші болып орналасқан. Содан бері аттай 35 жыл өтіпті. Осы салада табан аудар­май қызмет етіп келе жатқан кейіпкеріміз 2006 жылы «Батыс энергетика ардагері» атағына ие болған. Тәжірибесі толысқан маман ретінде әріптестері оны айрықша құрметтейді.

«Мен мекемеге жұмыс­қа келгенде Қайыр­ғали аға сан жылғы еңбек өтілі бар тәжірибелі маман еді. Қазір бір салада, бір брига­дада қызмет етеміз. Ол «ЭТЛ-35» аталатын электр-тех­­никалық зертханамыздың көлігін тізгіндейді. Үнемі сапардамыз, ауыл-аймақты аралап, қосалқы стансаларға барамыз. Жылдық кестеге сәйкес облыстың түкпір-түкпірін шарлап, электр құрылғыларын профилактикалық сынақтан өткізіп, ақауларды анықтаймыз.Үнемі жолда жүретіндіктен, көлігіміздің кідірмеуі, діттеген жерге тез жетуіміз өте маңызды. Қайырғали аға ешқашан жолда қалдырған емес. Бұл кісінің «темір тұлпары» жылдың қай мезгілінде де сақадай сай», дейді мекеменің оқшаулау және кернеуден қорғау қызметінің басшысы Санжар Әміреев.

Қазақта «мал иесіне тартады» деген сөз бар. Қайрекең қыз­мет­тік көлігін әрдайым бабын­да ұстайды: ай сайынғы техни­ка­лық күтім, жоспарлы жөн­деу, қауіпсіздік, бақылау тетік­терін тексеріп отыру – бұлжы­мас дағдыға айналған. «Ауы­рып ем іздегенше, ауырмай­тын жол ізде» қағидасы адамға ғана емес, техникаға да қатысты дейді ол. Бұл, әрине, көп жылғы тәжірибе мен жауапкершіліктен туындайтын қасиет.

Энергетиктердің жұмысы әскери қызметке ұқсас. Тәулік­тің кез келген уақытында, ауа райының қолайсыздығына қара­мастан жолға шығуға тура келеді. Осындай сәтте Қайыр­ғали Жұмаұлының сабырлы мінезі мен сенімді іс-әрекеті бүкіл топқа демеу болады.

2024 жылғы көктемде Батыс Қазақстан облысында алапат су тасқыны болды. Тілсіз жау көптеген елді мекенге қауіп төндірді. Бірнеше шақырымдық электр желісі су астында қалып, бағаналар құлады. Бөрлі ауданының Ақсай қаласында, Пугачев ауылында энергетиктер құтқарушылармен бірге күні-түні қызметте жүр­ді. Қуаты 35/10 кВ «Аралтал» қо­салқы стансасын қалпына келтіру оңайға соқпады. Құла­ған тіреулерді қайта орнату, тіректер мен сымдарды ауыс­тыру  үшін «Батыс Қазақстан АЭЖК» ЖШС-ның жедел тобы сол жерден табылды. Арнасынан асқан Шыңғырлау өзенінің жағасында, сарқыраған су мен күркіреген сеңмен алысып жүріп, Қайырғали Жұмаұлы 1 шақырым қашықтықтағы электр өткізгішін ауысты­рып, бұзылған 10 кВ электр желі­сін қалпына келтіріп жатқан мамандарға ерекше көмек көрсетті. Сондай-ақ түн ішінде «Ақсайжылқуат» мемлекеттік кәсіпорнының 600 метрлік тіректерін, оқшаулағыштар мен өткізгіштерді ауыстырғаны да әріптестерінің есінде.

«Энергетика саласы – эконо­миканың күретамыры. Жарық пен жылуды үздіксіз жеткізіп отырған мамандар елдің тұ­рақты дамуы мен халықтың тұр­мыс сапасына тікелей үлес қосып келеді. Қыстың қақа­ған аязында да, жаздың аптап ыстығында да біз тәулік бойы тынымсыз еңбек етеміз. Әсіресе кейінгі кезде салада ин­фра­құрылымды жаңғырту, цифрландыру мен баламалы энергия көздерін дамыту бағытында маңызды жобалар жүзеге асырылып жатыр. Еліміз еңбегімізді елеп, өткен жылдың соңында Президент III дәрежелі «Еңбек даңқы» орденін өз қолымен кеудемізге тақты. Қарапайым жұмысшының еңбегі ескеріліп, мерейі өскені – үлкен мәртебе. Біздің жетістік – ұжымдық еңбектің нәтижесі. Мәселен, мен өз әріптестерім – учаске басшысы Санжар Әміреев пен инженер Алтынбек Кереевтің көптеген жұмысшы-еңбеккерді баулып, тәрбиелеп жүрген еңбегі ескерілсе, келешекте олардың да қажырлы ісі өз бағасын алса деп тілеймін», дейді еңбек ардагері.

Энергетика – қолға ұстал­майтын, көзге көрінбейтін, бірақ қазіргі экономиканың ең қажетті шешуші күші. Ағза­ны түгел торлап, тырнақтың ұшы­нан төбе құйқаға дейін таралатын жүйке тамырлары секілді, энергетика да бүкіл саланы қамтып жатыр. Мұны қарапайым адам бар кезінде байқамас, бірақ өшкен сәтте бірден іздейтіні анық. Ендеше, осындай маңызды саланың үздіксіз жұмыс іс­теп тұруына үлес қосқан әр адам­ның еңбегі қадірлі.

Батыс Қазақстан облысы 

Соңғы жаңалықтар

Майталман маман, тәжірибелі тәлімгер

Еңбек • Бүгін, 08:17

Биометриялық төлем: Жаңашылдық пен қауіпсіздік

Технология • Бүгін, 08:15

Халыққа жылу сыйлаған

Еңбек • Бүгін, 08:12

Апатты баспаналар азаймай тұр

Қоғам • Бүгін, 08:10

Қаржыны тиімді басқару жоспары бекітілді

Экономика • Бүгін, 08:07

Құқықтық мемлекет қағидаттарының арқауы

Ата заң • Бүгін, 08:05

Бағаны өсіруге негіз жоқ

Инфляция • Бүгін, 08:03

Туристік нысандардың дайындығы тексерілді

Туризм • Бүгін, 08:00

Өңдеу өнеркәсібінде өсім бар

Саясат • Бүгін, 07:58

Ағаш өндірісіндегі игі бастама

Өндіріс • Бүгін, 07:55

Мемлекеттік билік тарихы туралы анықтамалық

Саясат • Бүгін, 07:53

Көмір саласы кешенді дамуға бет алды

Саясат • Бүгін, 07:50

Жер берудегі заманауи формат

Саясат • Бүгін, 07:48

Қасым-Жомарт Тоқаев Таяу Шығыстағы соғысты толық тоқтату туралы келісімді құптайды

Президент • Бүгін, 07:47

Фокус, команда және нәтиже

Саясат • Бүгін, 07:45

Барлық жаңалықтар