Маңғыстауда дрондар туристерді бақылап, сирек кездесетін жануарларды қорғауға көмектесуде

Маңғыстау облысындағы "Қызылсай" табиғи паркінде бақылау күшейтілді. Саяхатшылар ағыны артып келеді, енді инспекторларға дрон көмектесіп жатыр. Мамандар әуеден туристік маршруттарды бақылап, заң бұзушылықтарды анықтайды және сирек кездесетін жануарлардың тыныштығын күзетеді, деп хабарлайды Tengri Travel 24.kz арнасына сілтеме жасап.

Табиғи парк 370 мың гектар аумақты алып жатыр. Мұнда Қазақстанның Қызыл кітабына енген жануарлар мен құстардың сирек түрлері мекендейді. Мемлекеттік инспекторлар үш бақылау бекетінде тәулік бойы кезекшілік етеді. Олардың бірі Маңғыстау облысының ең танымал орындарының бірі – Бозжырада орналасқан. Шатқалда фототұзақтар мен камералар орнатылған. Осы көктемдегі санақ кезінде мұнда 1,5 мыңнан астам үстірт муфлоны және 200-ге жуық қарақұйрық есепке алынды. Өткен жылы нысанға жемтік іздеп шыққан азиялық қабылан іліккен болатын.

"Өткен жылы бізге 7,5 мыңға жуық турист келді. Осы жылдың тоғыз айында олардың саны 7 мыңнан асты. Біз келушілерге табиғи ландшафтты бүлдіруге, белгіленген маршруттардан шығуға, от жағуға және қоқыс тастауға болмайтынын ескертеміз. Инспекторлар мұндай түсіндіру жұмыстарын үнемі жүргізіп тұрады", - деді "Қызылсай" мемлекеттік табиғи паркі бөлімінің бастығы Саламат Қанбаев.

Мұнда әлемнің түкпір-түкпірінен туристер келеді. Мысалы, фотографтар Алекс Вайдес пен Изабелла Табаччи Италиядан келген. Олардың мақсаты – Қазақстанды саяхатшылар көзімен көрсету.

"Ақтау әуежайына қонған бойда автокөлік жалдап, осы жаққа аттандық. Әріптесім Изабелла екеуміз жетекші еуропалық басылымдарда жұмыс істейміз. Біздің мақсатымыз – Қазақстанда саяхаттаудың қаншалықты ыңғайлы және, ең бастысы, қауіпсіз екенін әлемге паш ету", - деді Вайдес.

"Бізге Бозжыра маңындағы Боқты тауы саяхатшылардың ең сүйікті орындарының бірі екенін айтты. Енді оны өз көзімізбен көріп, ерекше көрінісіне тәнті болдық. Сондай-ақ бұл таудың қазақстандық 1000 теңгелік банкнотта бейнеленгенін білгенде таңғалдық", - деп атап өтті Табаччи.

Мұнда әсіресе жазда адам көп болады, кейбір саяхатшылар табиғат аясында бірнеше күн түнейді. Мұндай жағдайда инспекторлар далада от жағылмауын, ал турфирмалар топтарды ыстық тамақпен, шатырлармен және биодәретханалармен қамтамасыз етуін қадағалайды. Кейінгі екі жылда 20-ға жуық заң бұзушыға әкімшілік айыппұл салынған, деп нақтыланады сюжетте.

Бұған дейін Маңғыстау облысында ерекше қорғалатын табиғи аумақтарға бару тарифтері мен ережелері өзгеретіні туралы жазған болатынбыз. Толығырақ материалда.

Маңғыстауға қоқиқаздар келе бастады: алғашқы тобы Үстірт қорығына қонды

Бізді Google-дың негізгі дереккөздер тізіміне қосыңыз