Мароккодан Сеутаға 40 мыңнан астам мигрант өтті

Испанияның Солтүстік Африкадағы анклавы — Сеутада миграциялық дағдарыс өршіді. Билік мәліметінше, соңғы күндері Мароккодан заңсыз жолмен 40 мыңнан астам адам шекарадан өтіп, қалаға кірген, деп хабарлайды BBC. 

Ішкі істер министрлігі нақты санды 49 мың деп жариялады.

Оқиғадан кейін Испания үкіметі қосымша күш жіберді: 200 арнайы полиция қызметкері мен 60 әскери Сеутаға жеткізілді. Жарияланған бейнекадрларда жүздеген мигранттың теңіз арқылы үрлемелі шеңберлермен жүзіп, қақпаларды бұзып қалаға кіргені көрінеді. Кейбірі «Испания жасасын!» деп айқайлаған.

Сеута ұзақ уақыт бойы Еуропаға жетуді көздеген мигранттардың басты бағыты болып келген. Шілде айының басында Испания Жоғарғы соты мигранттарды теңізде ұсталған жағдайда дереу қайтару тәртібін тоқтатқан еді. Үкімет бұл шешімді қылмыстық топтар пайдаланып, миграция ағынының күрт өсуіне себеп болды деп санайды.

Қала мэрі Хуан Хесус Вивас төтенше жағдай жариялауды талап етті. Премьер-министр Педро Санчес пен ішкі істер министрі Фернандо Гранде-Марласка Сеутаға барып, жергілікті билікпен кездеседі.

Франция мен Италия Испаниядан келетін адамдарға қатысты шекаралық бақылауды енгізу мүмкіндігін қарастыруда. Италия премьері Джорджа Мелони Шенген келісімін уақытша тоқтатуға дайын екенін мәлімдеді.

Соңғы айларда Сеутаға жетуге талпыныс кезінде 60 адам қаза тапты. Бұл жағдай 2021 жылғы дағдарысты еске салады, сол кезде бірнеше күн ішінде 10 мыңға жуық мигрант Мароккодан Сеутаға өткен болатын.

Бүгін, 14:07