Мигрант операциясы: 7 мыңнан астам заң бұзушылық анықталды

Қазақстанда өткен «Мигрант» жедел-профилактикалық іс-шарасының қорытындысы жарияланды.
Қазақстан Ішкі істер министрлігі мәліметінше, республика бойынша 7 мыңнан астам құқық бұзушылық тіркелген.

Атап айтқанда, 4,1 мың шетел азаматы елде болу қағидаларын бұзғаны үшін әкімшілік жауапкершілікке тартылды. Тағы 2,7 мың шетелдік заңсыз еңбек қызметін жүзеге асырғаны үшін жауапқа тартылған.

Сонымен қатар, 2,2 мың қазақстандық пен заңды тұлға шетел азаматтарының келуі туралы полицияға уақытылы хабар бермегені үшін жазаланған. Ал 500-ден астам жұмыс беруші шетелдік жұмыс күшін заңсыз пайдаланған. Жалпы салынған айыппұл көлемі 200 млн теңгеден асты.

Көші-қон заңнамасын бұзған 1,5 мың шетел азаматының елде болу мерзімі қысқартылып, 1,2 мың адамды елден шығару туралы сот шешімі қабылданды. Оның ішінде 121 адам мәжбүрлі түрде депортацияланып, барлығына Қазақстанға 5 жылға кіруге тыйым салынды. Олардың сегізі деструктивті-радикалды ағым өкілдері екені анықталған.

Іс-шара барысында 24 қылмыстық іс қозғалды. Оның ішінде мемлекеттік шекараны заңсыз кесіп өту, заңсыз көші-қонды ұйымдастыру және шетелдік жұмыс күшін тарту қағидаларын бұзу фактілері бар.

ІІМ дерегінше, мұндай құқық бұзушылықтарға көбіне Қазақстан азаматтарының өзі себепкер болады. Негізгі фактор — заңсыз әрі тез табыс табуға ұмтылу.

Жекелеген өңірлерде, соның ішінде Шымкент қаласы мен Жамбыл облысы, Шығыс Қазақстан облысы аумақтарында заңсыз жұмыс күшін тарту деректері тіркелген. Осы фактілер бойынша Қылмыстық кодекстің 395-бабы бойынша тергеу жүргізілуде.

Сондай-ақ жалған құжаттар арқылы шетел азаматтарын заңдастыру дерегі анықталып, Қылмыстық кодекстің 394-бабы аясында іс қозғалған.

Операция барысында іздеуде жүрген 22 шетел азаматы ұсталды. Олар Алматы қаласы мен бірқатар өңірлерде қолға түскен.

Құқық қорғау органдары көші-қон заңнамасының сақталуын бақылау жұмыстарын жалғастыратынын мәлімдеді.