Мейрамбек Назарқожаев Данияның Корольдік театрына қабылданған тұңғыш қазақ

— Ауылдың қарапайым баласымын. Алматы облысы, Іле ауданы, Қараой ауылында дүниеге келгенмін. Кішкентай кезімде менен жақсы футболшы шығады деп айтатын. Бірақ анамның жақындары ұсыныс жасап, осы салаға келдім. Балетке 10 жасымда бет бұрдым. Оқуда озат болдым, 8 жылда халықаралық конкурстарда лауреат болдым. Арманым шетелде шыңдалу болды, соған қадам бастым, — дейді ол.

Өнер иесінің алғашқы белесі Мәскеумен байланысты. Бұл кезең жас әртіс үшін кәсіби қалыптасудың сатысына айналған.

— Ресей — әлемге танымал хореографтар мен бишілердің отаны. Мәскеуде Russian State Ballet труппасына қабылдандым. Труппаның көркемдік жетекшісі Вячеслав Гордеев маған сенім артып, үлкен рөлдерді беріп отырды. Сол кісінің қол астында Германия, Швейцария, Австрия, Қытайдың үлкен сахналарында және Үлкен театр, Кремльде жетекші партияларды сомдап өнер көрсеттім. Мен үшін Мәскеу Еуропаға жол ашатын үлкен асу болды, — дейді спикер.

Кейін бұл жол Германияға жалғасып, жаңа орта мен жаңа талаптар әртістің көкжиегін кеңейткен.

— Германияның Киль қаласында Қазақстаннан бишілер бұрыннан бері өнер көрсететін. Ол шағын театр болғанмен, деңгейі өте жоғары. Сол жерде тыңдалымнан өтіп, арнайы шақыру алдым. Алғашында ағылшын тілін білмегендіктен қиналдым. Бірақ театр директоры, Украинада туған, орысша білетін Ярослав Иваненко көп көмектесті. Жаттығуларда түсінбей жатсам, орысша түсіндіретін. Сонымен қатар қазақстандық әртістер де қолдау көрсетті. Сол себепті ортаға тез сіңіп, ағылшын тілін де жылдам үйреніп кеттім, — дейді ол.

Осы тәжірибенің бәрі оны Еуропадағы ең беделді сахналардың біріне алып келді.

— Дания корольдік театрының үш жүз жылдық тарихы бар. Еуропадағы ең көне театрлардың бірі. Онда жұмыс істеуді армандамайтын әртіс жоқ шығар. Алдымен түйіндемемді жібердім. Жүзге жуық үміткердің ішінен 10-15 адамды іріктеп, арнайы сынаққа шақырады. Соның ішінде тек екі әртіс қана қабылданады. Мен сол іріктеуден өтіп, театр труппасына қосылдым. Қазір осы тарихи сахнада еңбек етіп келемін. Сонымен қатар Дания корольдігінің жоғары марапатын да алдым, — деді Мейрамбек Назарқожаев.

Театрдың тағы бір ерекшелігі — әртістерге берілетін әлеуметтік кепілдіктердің жоғары болуы.

— Өмір бойына келісімшарт жасастық. Бұл — үлкен қолдау. Қаласаң, одан бас тартуға болады. Қазақстанда бұл жүйе қалай жұмыс істейтінін нақты білмеймін, бірақ осындай тәжірибе енгізілсе екен деймін, — дейді балет әртісі.

Мейрамбек Назарқожаев туған елмен байланысын үзген жоқ. Керісінше, жинаған халықаралық тәжірибесін Қазақстанға әкелуді көздейді. Осы бағытта ол отандық әріптестерімен бірге Nomad Ballet Project жобасын іске қосты. Жоба аясында Канада, АҚШ, Жапония, Португалия, Оңтүстік Корея, Польша елдерінен келген Дания Корольдік театрының жетекші әртістері Алматы Theatre сахнасында өнер көрсетіп, көрерменнің жоғары бағасына ие болды.

Сонымен қатар жоба тек сахналық қойылымдармен шектелмей, кәсіби тәжірибе алмасуға да жол ашты. Атап айтқанда, балет әртістері мен Бурнонвиль техникасының шебері Динна Бьёрн Алматы хореография училищесінің студенттеріне арнайы мастер-класс өткізіп, өз тәжірибесімен бөлісті.

Бұл бастама алдағы уақытта да жалғасын таппақ. Ендігі кезекте елорда көрерменін ерекше мәдени кеш күтіп тұр.

— 5 сәуір күні Астанада Дания Корольдік театрының гала кеші өтеді. Жаңа техника, жаңа әсермен бөлісуге асықпыз. Болашақта да ел көріп, жер көріп, толыққанды тәжірибе жинаған соң елге оралуды ойлаймын. Бар мақсатым — білгенімді үйрету, — дейді ол.

Айта кетейік, Бейжіңде Қазақстан мен Қытайдың өзара мәдениет жылының ашылу салтанаты өтті.