Мемлекет басшысы сапарларының нәтижесінде қандай жобалар іске асырылады

— 2025 жылы Мемлекет басшысы сапарларың қорытындысында жалпы сомасы 74,3 млрд АҚШ доллары болатын 141 коммерциялық құжатқа қол қойылды. Бұл келісімдер еліміздің ұзақ мерзімді даму басымдықтарына толық сәйкес келетін энергетика, цифрлық технологиялар, көлік-логистика, агроөнеркәсіптік кешен, денсаулық сақтау, білім беру және құрылыс салаларын қамтиды. Аталған келісімдер аясында бірқатар ірі әрі жүйе құраушы жобаны іске асыру көзделген, — деді Сыртқы істер министрлігінен агенттіктің ресми сауалына орай.

Мәселен, сыртқы саясат ведомствосының мәліметінше, отын-энергетика саласында «CNPC» және «Air Liquide» компанияларының қатысуымен бірқатар өндірістік және технологиялық жобалар жүзеге асырылып жатыр. Көлік және логистика бағытында «Abu Dhabi Ports Group» компаниясымен бірлесіп, транзиттік инфрақұрылымды дамытуға және халықаралық дәліздердің тиімділігін арттыруға бағытталған бастамалар қолға алынған. Агроөнеркәсіптік кешенде «Tiryaki Agro» компаниясымен бірлесіп, ауыл шаруашылығы өнімдерін терең өңдеуге бағытталған өндірістер мен ірі агроөнеркәсіптік кешендерді құру жұмыстары жүргізіліп жатыр.

— Жалпы алғанда, Қазақстан экономикалық өсімнің орнықты қарқынын сақтап отыр. Халықаралық қаржы ұйымдарының бағалауынша, еліміздің атаулы жалпы ішкі өнімі 300 млрд АҚШ долларынан асып, Қазақстан әлемнің ірі 50 экономикасының қатарына енді. Соңғы жылдары экономиканың нақты өсімі тұрақты түрде жоғары деңгейде қалыптасуда. Бұл — жүргізіліп жатқан жүйелі реформалар мен инвестициялық саясаттың тиімділігін көрсетеді. Инвестициялық әлеуетті одан әрі арттыру мақсатында Үкімет пен сыртқы саясат ведомствосы тарапынан кешенді шаралар қабылдануда. Ең алдымен, өңірлердің нақты қажеттіліктерін ескере отырып, инвестициялық жобалардың сапалы пулы қалыптастырылып жатыр, — деді ведомстводан.

Сыртқы істер министрлігі шетелдегі мекемелер арқылы «таргеттеу» қағидаттарына негізделген жұмыс аясында әлеуетті инвесторларды іздестіруді және бастапқы келіссөздерді ұйымдастыруды қамтамасыз етеді. Бұл инвесторлардың нақты сұраныстарына жауап беретін, дайын әрі бәсекеге қабілетті жобаларды ұсынуға мүмкіндік береді.

— Мемлекет басшысының тапсырмасы бойынша Еуразиялық даму банкінің қолдауымен Ұлттық цифрлық инвестициялық платформа іске қосылды. Аталған жүйе инвесторлар мен мемлекеттік органдар арасындағы өзара іс-қимылды жеделдетіп, барлық инвестициялық жобалар бойынша процестердің ашықтығы мен мерзімдерінің сақталуын нақты уақыт режимінде бақылауға мүмкіндік береді. Платформаға Үкімет Аппараты, орталық және жергілікті атқарушы органдар, сондай-ақ квазимемлекеттік сектор ұйымдары қосылған. Жалпы қабылданып жатқан шаралар инвестициялық қызметті жүйелі, ашық әрі нәтижеге бағдарланған деңгейге шығаруға, халықаралық бизнеспен тікелей байланысты күшейтуге және ел экономикасына ірі әрі сапалы инвестициялар тартуға бағытталған, — деді Сыртқы істер министрлігі.

Айта кетейік, елімізде мемлекеттік инвестициялық жобаларды іске асыру қағидаларына өзгерістер енгізіледі.