Келер жылы ауыл шаруашылығында қандай жобалар іске асады?

Елімізде келер жылы ауыл шаруашылығында іске қосылатын ірі жобалар белгілі болды. Үкімет отырысында министр Айдарбек Сапаров әр жобаға жеке тоқталып, олардың мүмкіншілігін атап өтті, деп хабарлайды Egemen.kz.

2026 жылы жалпы сомасы 394 млрд теңге болатын 50 жобаны іске асыру және 2 жарым мың жаңа жұмыс орнын ашу жоспарланып отыр.

Соның бірі – Жамбыл облысында жүзеге асатын жоба. Онда 300 мың тонна жүгеріні терең өңдеу көзделсе, Алматы облысында 25 мың тонна жеміс-жидекті өңдеу ісі қолға алынбақ. Бұдан бөлек, балмұздақ өндірісі 35 мың тоннаға дейін ұлғайтылады және тағы бір жоба аясында 250 мың тонна шамасында астық және майлы дақылдар өңделмек.

Министрдің дерегінше, Қостанай облысында кондитерлік өнімдер өндірісі 13 мың тоннаға артады. Ал Абай облысында 7,2 мың тонна шұжық өнімдерінің өндірісі іске қосылады. 2027 жылы жалпы сомасы 874,3 млрд теңге болатын 26 жобаны іске асыру және 3,5 мыңнан астам жұмыс орнын құру көзделіп отыр.

Оның ішінде Астана қаласында 250 мың тонна бидай және 80 мың тонна бұршақ өңдейтін, ал Ақмола облысында жылына 1 млн тонна бидай өңдейтін жоба іске аспақ. Қолға алынатын бастамалар қатарында жұмыртқа, картоп, мал мен өсімдік өнімдерін өңдеу жобалары бар.

Айта кетейік, биыл 9 айда 2,5 млрд доллардың ауыл шаруашылығы өнімдері экспортқа шығарылды.