Мемлекет Отбасы банк депозиттеріне сыйақы төлемейді министр себебін айтты

АСТАНА, 22 қазан – Sputnik. Қаржы министрі Мәди Такиев Отбасы банкінде ашылған депозиттер бойынша мемлекеттің сыйақысы бюджет есебінен төленбейтінін мәлімдеді, деп хабарлайды Sputnik Қазақстан тілшісі.

Ресми мәліметке сәйкес, Отбасы банк құрылғалы бері 12 жылдың ішінде мемлекеттік сыйақыларға бюджеттен барлығы 900 млрд теңге бөлінген болатын. Осы уақыттың ішінде салымшылардың саны 10 есеге өсіп, 2,1 млн адамға жетті. Ал Отбасы банкінің былтырғы таза табысы 120 млрд теңгені құрады.

"Осыған байланысты сыйақылар банктің өз ақшасынан төленеді деген шешім қабылданды. Соның арқасында біз бюджет шығыстарын азайтамыз. Ал салымшылар үшін ештеңе өзгермейді", - деді Такиев мәжілістің бүгінгі отырысында.

Айта кетері, бұған дейін үкіметтің инфляцияны тұрақтандыру шаралары аясында Отбасы банкі арқылы ипотеканың көлемін арттыруға шешім қабылданған болатын. “Әскери баспана” бағдарламасы да жанданады.