Әлия фильмі неге түсірілмей қалды министр себебін айтты

АСТАНА, 8 қараша – Sputnik. Мәдениет және ақпарат министрі Аида Балаева "Әлия" фильмі не себепті түсірілмей қалғанын айтты, деп хабарлайды Sputnik Қазақстан.

"Microcosm Pictures" ЖШС-ның бірлескен жобасы былтыр ұлттық киноны қолдау орталығы өткізген байқауда жеңімпаз атанған болатын.

"Алайда продакшн-компания қаржылық себептерге байланысты түсіруден бас тартты. Соған қарамастан, алдағы уақытта бұл идея қайта жанданып, Әлия Молдағұлова туралы фильм міндетті түрде көрермендерге жол тартады деп сенеміз", - дейді Балаева.

Оның айтуынша, қазір көрермен көбіне жеңіл жанрдағы фильмдерді таңдап, авторлық туындыларды көп көре бермейді. Дегенмен тарихи әрі патриоттық бағыттағы жобаларға тұрақты түрде қолдау жасалады.

Мәселен, жуырда "Капитан Байтасов" фильмі көрерменге жол тартты. Халық қаһарманы, полиция капитаны Ғазиз Байтасовтың ерлігіне арналған бұл фильм көпшілікті ізгі құндылықтарға үндейді.