Өзбекстанмен шекарада адамдар жиналып қалды шекара қызметі себебін айтты

АЛМАТЫ, 9 мамыр – Sputnik. Ұлттық қауіпсіздік комитетінің шекара қызметі Өзбекстанмен шекарада адамдардың не себепті жиналып қалғанын түсіндірді, деп хабарлайды Sputnik Қазақстан шекара қызметінің ресми сайтына сілтеме жасап.

Қазақстан мен Өзбекстан шекарасындағы "Қапланбек" бекетінде адам өткізу жұмысы баяулады.

"Бұл көршілес аумақтағы "Новои" өткізу бекетінің тіркеу жүйесіндегі іркілістерге байланысты. Қазақстан тарапынан өткізу пункті штаттық режимде жұмыс істеп тұр, ешқандай шектеу енгізілген жоқ", - делінген ресми хабарламада.

Екі елдің шекарашылары өзара іс-қимыл шараларын өткізді. Өзбек тарапының мәліметінше, ақауларды жою және өткізу пунктінің жұмыс қабілетін қалпына келтіру шаралары жүргізіліп жатыр.

"Сапарларды жоспарлау кезінде осы ақпаратты ескерулеріңізді сұраймыз", - дейді шекарашылар.