Миллиард, алтын және ондаған элиталық көлік: сот Nazira Gold тың атышулы ісіне нүкте қойды

Кассациялық сот 1,2 миллиард теңгеден астам қаражат жинап, кейін ол ақшаны элиталық көліктерге, жылжымайтын мүлікке және зергерлік бұйымдарға жұмсаған Nazira Gold қаржы пирамидасын ұйымдастырушыға қатысты үкімді күшінде қалдырды, деп хабарлайды Tengrinews.kz.

Қылмыстық істер жөніндегі кассациялық соттың хабарлауынша, 2024 жылдың мамырынан 2025 жылдың ақпанына дейін пирамида ұйымдастырушысы жоғары табыс уәде етіп, қазақстандықтардың ақшасын тартып келген. Салымдардың жалпы сомасы 1,2 миллиард теңгеден асты.

"Тергеу және сот барысында алынған ақшаның қымбат көліктер, жылжымайтын мүлік және зергерлік бұйымдар сатып алуға жұмсалғаны анықталды. Мүліктің шығу төркінін жасыру үшін ол туыстары мен басқа да тұлғалардың атына ресімделген", - деп мәлімдеді сот.

Нәтижесінде сот үкімімен мыналар тәркіленді:

392,9 миллион теңге қолма-қол ақша; құны 896,3 миллион теңге болатын 17,8 келі алтын зергерлік бұйымдар; 186,9 грамм күміс бұйымдар; 52 автокөлік; тұрғын үйлер, пәтерлер және коммерциялық жылжымайтын мүлік.

Сот деректеріне сәйкес, іс бойынша 151 адам жәбірленуші деп танылды. Олардың 76-сының пайдасына материалдық шығын өндірілді. Тағы 12 жәбірленушінің шығын көлемі анықталғаннан кейін азаматтық талап арыздарын қанағаттандыру құқығы танылды, ал 63 азаматқа сотқа жеке талаптармен жүгіну мүмкіндігі түсіндірілді.

Пирамида ұйымдастырушысы аса ірі мөлшерде алаяқтық жасағаны, қаржы пирамидасын құрып, оған басшылық еткені, сондай-ақ қылмыстық жолмен алынған мүлікті заңдастырғаны үшін кінәлі деп танылды. Оған мүлкі тәркіленіп, жеті жыл бойы ақшалай қаражат пен инвестиция тартуға байланысты қызметпен айналысуға тыйым салына отырып, 10 жылға бас бостандығынан айыру жазасы тағайындалды.

Бұл ретте сотталушының кәмелетке толмаған баласы болуына байланысты жазаны өтеу мерзімі бір жылға кейінге қалдырылды.

ҚАЗІР ТАЛҚЫЛАНЫП ЖАТЫР

Испанияда танымал зиян әдетке тыйым салынуы мүмкін

Кеше 18:07 1

Қорғаушы тарап әрекеттердің дұрыс сараланбағанын және жазаның тым қатаңдығын алға тартып, үкімнің күшін жоюды сұрады. Жәбірленушілердің бір бөлігінің өкілі де мүлікті тәркілеу туралы шешімді қайта қарауды сұрап, ол қаражат шығынды өтеуге жұмсалуы тиіс деп есептеді.

Алайда кассациялық инстанция сотталушының кінәсі зерттелген дәлелдемелермен толық расталады, ал жаза жасалған қылмыстардың ауырлығына сәйкес келеді деген қорытындыға келді. Сондай-ақ сот жәбірленушілердің талаптары тәркіленген мүлік мемлекет кірісіне айналдырылғанға дейін қанағаттандырылатынын атап өтті.

"Қарау қорытындысы бойынша кассациялық шағымдар қанағаттандырусыз, сот актілері өзгеріссіз қалдырылды", - делінген хабарламада.

Еске салсақ, Nazira Gold қаржы пирамидасының қызметі 2025 жылдың наурызында тоқтатылған болатын. Сол кезде Nazira Gold өзін зергерлік бұйымдарды сататын компания ретінде таныстырып, күдіктілер салымшыларға салынған соманың 20-40 пайызы мөлшерінде ай сайынғы табыс уәде еткені хабарланған еді.

Google News арқылы жаңалықтарымызды қадағалаңыз

Жазылу