Министрлік Түркияда жұмбақ жағдайда қаза тапқан қазақстандық әйел жайында жауап берді

Түркиялық басылымдарда Антальяда қазақстандық келіншектің жұмбақ жағдайда қаза табуы туралы түрлі ақпарат пайда болды. Бұған Сыртқы істер министрлігі өкілдері түсініктеме берді, -деп хабарлайды Aikyn.kz

Antalya bugün басылымының хабарлауынша, Антальядағы үйлердің бірінен Қазақстаннан келген әйелдің денесі табылған. Оқиға бес қабатты тұрғын үйдің бірінші қабатында болған.

"Алдын ала мәліметтер бойынша, ер адам 43 жастағы қазақстандық әйелдің жансыз денесін тауып алып, бұл туралы шұғыл көмек көрсету қызметіне хабарлаған. Оқиға орнына медициналық бригадалар мен полиция жіберілді.

Муниципалды дәрігер өлімді күмәнді деп санап, бұл мекенжайға тергеу топтары мен прокурорды жіберген. Әйелдің денесі өлім себебін анықтау үшін мәйітханаға жеткізілді", - деп жазады басылым.

Оған қоса қайтыс болған әйелдің 7 жасар қызы бар екені атап өтіледі. 

Қазақстан СІМ өкілдері марқұмның Қазақстан азаматы емес екенін атап өтті.

"Қолда бар мәліметтерге сәйкес, ол Түркия азаматы және Түркия азаматымен некеде болған", - деп хабарлады ведомствоның баспасөз қызметі өкілдері.