Мойнымды бұрап, ақшамды алып кетеді : Жетісу тұрғыны екі баласынан зәбір көріп жүр

АСТАНА, 19 наурыз – Sputnik. Жетісу облысындағы Жансүгіров ауылының 62 жастағы тұрғыны Бақытбек Қадыш бірнеше жыл бойы екі баласынан жәбір көріп келеді. Қос ұлдың көксегені не, әкенің бұйымтайы қандай? Sputnik Қазақстан тілшісі мәселенің мән-жайын анықтады.

Етік тігіп, нәпақасын тауып жүрген ер адамның айтуынша, тапқан-таянғанын екі ұлы Бекзат пен Бекболат алып кетеді екен.

"Бұларды полиция ұстап алып кетеді, он күн жатып шығады, содан кейін қайта тиіседі. Жұмыс істеп отырған жерімді ойрандап кетеді. Менен де қателік кеткен шығар деп кешірім де сұрадым. Ақша сұрай береді, бермесең білгенін істейді. Алдыңғы жылы екі ұлым көлікке мінгізіп, айдалаға апарып тастады. Ауырып әрең жазылдым", - дейді Бақытбек аға.

Екі балам басыма шықты деген ақсақалдың екі отбасы бар. Бәйбішесінен төрт ұл сүйген. Көресіні осы бәйбішесінің екі ұлынан көріп отыр екен.

"Мен ұлдарыма үй, салоннан көлік алып бердім. Үлкен ұлымның үш баласы бар, етік тігумен айналысады. Үш баласы бар. Ешбір тірлігі алға баспай, қарызға белшесінен батып жүреді. Екінші ұлымның алты баласы бар. Денеме жарақат түспейтіндей етіп ұрып, қылқындырып, тұншықтырып, телефонымды, ақшамды тартып алады. Полиция "өзіңізден де бар, арыз бересіз де, қайтарып аласыз" дейді", - деген ол қазіргі уақытта екі ұлымен соттасып жүргенін айтты.

Әлеуметтік желіге жария еттің деп немерелері шағымданып жатқан көрінеді. Бақытбек аға қазір екінші әйелімен тұрып жатыр екен.

"Ұлдарым шешесін маған қарсы қояды, ол да маған тиіседі. Үйлерін де алып бердім, енді маған не қыл дейді?! Менің бір ғана өтінішім, дүкенді маған қалдырсын. Бұл дүкен кіші ұлымда еді. Ол ұлыма 4-5 үй алып бердім. Маған осы дүкенді алып беріңіздерші. Қартайғанымда мен де күн көруім керек қой", - дейді баласынан зәбір көрдім деген тұрғын.

Мәселенің мән-жайын Жетісу облыстық полиция департаментінен сұрап көрдік.

"12 ақпанда Ақсу ауданының 62 жастағы тұрғынының арызы негізінде ұрып-соғу фактісі бойынша қылмыстық іс қозғалды. Тергеу барысында құқыққа қайшы әрекеттерді оның 31 және 34 жастағы екі ұлы жасағаны анықталды. Сот үкімімен олар кінәлі деп танылып, әрқайсысына қамау түріндегі жаза кесілді. Сонымен қатар, істі қарау барысында сот олардың мінез-құлқына 3 ай мерзімге ерекше талаптар белгіледі, оның ішінде жәбірленушіге жақындауға тыйым салынды", - дейді полиция.

Қазіргі уақытта ер адамдар қамауда отыр. Бостандыққа шыққаннан кейін екеуі де профилактикалық есепке алынады. Жағдай полицияның бақылауында.