Мұны тергеуші жазды : Нұрай Серікбай ісінде айыпталушы алғашқы жауабынан бас тартты

Фото: Instagram/justice_for_nuray

Сот төрағасы Саммидин Темірлаев іс материалдарын жариялап, тергеу деректеріне сәйкес, оқиға күні Шерхан Аймахан Нұрайды кездесуге шақырғанын, ал қыз серуендеуден бас тартқаннан кейін оны ұзындығы 25 сантиметр болатын пышақпен жарақаттағанын мәлімдеді.

«Полиция шақырамын дедім»: Нұрай Серікбай ісінің куәгері сотта жауап берді

Тергеу материалына сәйкес, оқиғадан кейін айыпталушы Түркістан облысына барып, сол пышақпен өзіне қол жұмсамақ болған.

«Сіз көлікке отырып, Нұрайға қолданған пышақпен өзіңізге қол жұмсамақ болғаныңызды айтқансыз. Пышақты өзіңізге сұққанмен, батылыңыз жетпегенін, кейін телефоныңызды лақтырып, пышақтарды алып әрі қарай кеткеніңізді көрсеткенсіз. Ал кеше сотта ештеңе есіңізде жоқ екенін мәлімдедіңіз. Мұны қалай түсіндіресіз?» деп сұрады судья.

Бұған жауап ретінде Шерхан Аймахан бұл мәліметтердің барлығын тергеуші өзі ойдан шығарып, хаттамаға енгізгенін айтты. Алайда судья жауап алу хаттамасына айыпталушының адвокаты қол қойғанын, сондықтан оның қолдан жасалуы мүмкін емес екенін еске салды.

«Тамағы кесілген, жүзі тілінген»: Нұрай Серікбайдың ағасы сотта куәлік берді

Соған қарамастан, айыпталушы тергеу кезінде берген алғашқы жауабын мойындаудан бас тартып, оқиғаға қатысты ештеңе есінде жоқ екенін айтты.

Айта кетейік, қайғылы оқиға 2026 жылғы 11 қаңтар күні Шымкентте болған. 21 жастағы студент Нұрай Серікбай пышақ жарақатынан көз жұмды. Қатыгездікпен жасалған қылмысқа қызбен таныс болған 28 жастағы Шерхан Аймахан күдікті ретінде танылған. Тергеу мәліметінше, күдіктіге Қылмыстық кодекстің бірнеше бабы бойынша, атап айтқанда, сталкинг, некеге тұруға мәжбүрлеу және аса қатыгездікпен жасалған адам өлтіру бойынша айыптар тағылып отыр.