Бүкіл Қазақстаннан кешірім сұраймын : Нұрай Серікбай ісінде сотталушы соңғы сөзін айтты

Шымкентте Нұрай Серікбайдың қазасына қатысты қылмыстық іс бойынша сот отырысы жалғасып жатыр, – деп хабарлайды Aikyn.kz сайты.

Сот барысында айыпталушы Шерхан Аймахан қайғылы оқиғаға байланысты өкініш білдіріп, марқұмның жақындарынан және бүкіл Қазақстан халқынан кешірім сұрады.

«Мен осы іс-әрекетімнен Нұрайдың ата-анасынан, ағаларынан, туысқандарынан және өзімнің әке-шешемнен, барлық әулетімнен кешірім сұраймын. Мұндай жағдайға жетеді деп ешқашан ойлаған жоқпын. Өкінемін. Бүкіл Қазақстаннан кешірім сұраймын», – деді сотталушы.

Сонымен қатар ол өкінішін жасаған әрекеті үшін емес, оқиғаның осындай қайғылы жағдайға ұласқанына және дер кезінде ем қабылдамағанына байланысты айтып отырғанын жеткізді.

Шерхан Аймаханның сөзінше, бірнеше жыл бұрын алған бас жарақатынан кейін денсаулығына қатысты мәселелер туындаған. Оның айтуынша, ата-анасы өзін дәрігерлерге ғана емес, халық емшілеріне де көрсеткен.