МузАРТ тобының тарихы театрда сахналанды

Қазақ эстрадасында өзіндік орны бар «МузАРТ» тобының сахналық ғұмыры театр тілінде сөйледі. Түркістан музыкалық драма театры трионың 25 жылдығына орай, музыкалық-драмалық қойылымды сахналады.

Қойылым топ мүшелерінің алғаш кездесіп, тосыннан танысуынан басталады. Бір-біріне ұқсамайтын мінез, әртүрлі дауыс пен түрлі өмірлік ұстаным бір арнаға тоғысып, «МузАРТ»-тың дүниеге келуіне себеп болады. Спектаклде әншілердің образын театрдың жас актерлары шынайы сомдап шықты. Музыкалық драма жанрындағы қойылымда вокалға мән берілген. Актерлер кәсіби вокал мамандарымен жұмыс істеп, дауыс қойып, тыныс пен эмоцияны ән арқылы жеткізуге тырысты. Сондай-ақ онда өнер жолындағы қиындықтар, топтағы ішкі дағдарыс, достықтың сыналуы сынды сәттер көрініс тапқан.

Сәкен Майғазиев, «МузАРТ» тобының әншісі:

- Уақыт зымырап өтіп жатыр екен. Сәнде өзгере береді, қараңыздар, мынаның балақтары сол кезде өзгеше болды. Мына костюм әлі күнге дейін трендте, кейбір кастюмдерімізді қалай кигенбіз деп таңғалатын кездеріміз болды. Ит талаған деген костюміміз болатын. Джинсыден тігілген, алба-жұлба болатын. Жаңашылдық іздеген түріміз шығар. Сол енді уақыттың өтіп жатқанының көрінісі ғой.

Мерей Маханов, идея авторы:

- Жүз пайыз халыққа ұнайды деген сенімдемін. Өйткені үлкен еңбек кетті. Қаншама келіссөздер болды. Ағалармен бірге тілдесіп отырып, сұхбаттасып, көптеген ақпараттарды дамытып, оны сахнаға қалай бейімдейміз, өйткені бұл жерде тек қана өмір тарихына тікелей құралмаған. Бұл жерде сахыналық өңдеу бар. Толыққанды драматругиялық заңдылыққа құрылған туынды.