ЖИ технологиясы театрда

Театр әлемі жаңа тыныс алды. Елордада алғаш рет жасанды интеллекттің көмегімен жазылған «Жылы мұң» қойылымы көрерменге жол тартты.

AI технологиясы пьесаның драматургиясынан бастап музыкалық және көркемдік элементтері мен сценографиясына  жаңа леп әкелді.

Астана қаласы әкімдігінің «Әзербайжан Мәмбетов атындағы мемлекеттік драма және комедия театры» «Заң мен тәртіп» бағдарламасы аясында қоғамға ой салар ерекше премьераны ұсынды.  «Жылы мұң» пьесасының мәтіні жасанды интеллекттің көмегімен жазылды. Бұл театр өнерінде бұрын-соңды болмаған тың тәжірибе.  Қойылым 2000- жылдардағы өмірдің қасіретті тұстарын көрсететін әлеуметтік драма.

Пьесаның режиссері әрі авторы Нұржігіт Муслимовтың айтуынша, қойылымда бір отбасының ішкі күресі арқылы тұтас қоғамның трагедиясы ашылады.

Самат Тергембаев, Әзербайжан Мәмбетов атындағы драма және комедия театры директорының орынбасары:

- Жолдаудағы «Заң және тәртіп» бағдарламасы бойынша, біз қазіргі замандағы қасірет болып тұрған есірткінің тарамауына, соның зұлымат екенін мына өскелең ұрпаққа сахнада көрсету бағытында қойылған спектакль. Сюжеті өте ауыр. Өйкені бұл жерде басты бағыт ретінде жаңағы балаларға әр баланың тағдыры өз қолыңда. Балаларға керемет үлкен сабақ болатындай үлкен спектакль қойып жатырмыз.

«Жылы мұң» - көрген адамның жүрегіне үнсіз із қалдыратын қойылым. Онда әр отбасының сыры, әр баланың үні мен ананың арманы бар. Спектакль көрерменді ойландырып қана қоймай, адам өміріне жауапкершілікпен қарау қажет екенін тағы бір мәрте еске салады.

Азамат Әбдіхалық,  9 сынып оқушысы:

- Қойылым өзіме ұнады. Өте жақсы жасалды. Адамға зиянды заттар бар, соларға жоламау және оларды қабылдаумау жайлы көрсетілді деп ойлаймын.  Барлық нәрсе ортаға байланысты. Ата-ананың айтқанын тыңдай білу  қажет деп ойлаймын.

Қойылым жасөспірімдерге бағытталған үнсіз ескерту, ал ата-аналар үшін – ойлануға берілген уақыт. «Жылы мұң» көрерменін бей-жай қалдырмайтын, жүрекке жол табатын, қоғамды серпілтетін туындыға айналмақ.

Авторлары: Наргиз Бекмаганбетова, Бағдат Қайыркен