Мәскеуде Парасат майданы сахналанды

Мәскеуде «Парасат майданы» қойылымы сахналанды. Адамзаттың ішкі әлемі мен рухани құндылықтарынан сыр шертетін психологиялық драманың көрсетілімі Кіші театрда өтті.

Зор тәрбиелік мәнге ие туындыны талғамы биік көрермен жоғары бағалады. Қойылым несімен есте қалды? 

Ресейдің ең байырғы мәдени-сахналық орталықтарының бірі - Кіші театрда ине шаншар жер жоқ. Әсіресе, ұлттық театр өнеріне сусындап қалған отандастардың қарасы көп. Жас студенттер дәл осы қойылым арқылы елге, жерге деген сағынышымызды бастық дейді.

Адам болмысының күрделілігін, жақсылық пен жамандықтың ара жігін ажырату мәселелерін баяндайтын қойылым ресейлік көрерменнің көңілінен шықты. Ойландырып, толғандыратын драманы халық өң бойынан өткізіп, терең сезінді.

Қалибек Қуанышбаев театрының ұжымы сахналаған қойылым қазақ әдебиетінің классигі Төлен Әбдіктің «Оң қол» және «Парасат майданы» шығармаларына негізделген. Оқиға психиатриялық аурухана қабырғасында өрбиді. Басты кейіпкер - жалғыздықтан жапа жеккен жан. Ол адамдар арасындағы әділетсіздікке қарсы үн қатып, қоғамның қатал жүйесіне қарсы тұруға тырысады.

Гульсина Миргалиева, «Парасат майданы» спектаклінің қоюшы режиссёрі:

- Спектакліміз көп сахнаны көрді. Фестивальге қатысты. Мынау сахна біз үшін өте ыңғайлы. Театрдың тарихы мол екенін көріп тұрмыз. Ол энергетика арқылы сезіледі.

Жантебірентерлік қойылым әр көрерменнің жүрегінен орын алғаны хақ. Бұл шара Қазақстанның Ресейдегі мәдениет күндерінің аясында ұйымдастырылып отыр.

Авторлары: Мөлдір Жақан, Наргиз Рахимжан, Алексей Мжельский